ఇర్ఫాన్ పఠాన్ కొత్త ఇన్నింగ్స్.. ‘కోబ్రా’ లుక్ సూపర్బ్!

టీమిండియా మాజీ ఆల్ రౌండ‌ర్ ఇర్ఫాన్ ప‌ఠాన్ కొత్త ఇన్నింగ్స్ సూప‌ర్బ్ గా కొన‌సాగుతోంది. క్రికెట్ నుంచి వైదొలి‌గిన త‌ర్వాత ఇర్పాన్ సినీ రంగంలోకి అడుగు పెట్టిన విష‌యం తెలిసిందే. చియాన్‌ విక్రమ్‌ హీరోగా తెరకెక్కుతున్న 'కోబ్రా' చిత్రంలో న‌టిస్తున్నాడు ఇర్ఫాన్‌.

ఈ చిత్రానికి సంబంధించిన లేటెస్ట్ షెడ్యూల్ ప్ర‌స్తుతం ర‌ష్యాలో కొన‌సాగుతోంది. ఈ షెడ్యూల్ లో పాల్గొన్నాడు ఇర్ఫాన్‌. 'కోబ్రా' చిత్రంలో ఇర్ఫాన్‌ ప‌వ‌ర్ ఫుల్ రోల్ పోషిస్తున్నాడు. అస్లాన్ యిల్మాజ్ అనే ఇంటర్‌పోల్‌ ఆఫీసర్‌ పాత్రలో నటిస్తున్నాడు ఈ మాజీ క్రికెట‌ర్‌.

ఈ ఫారిన్‌ షూటింగ్ కు సంబంధించిన ఓ ఫొటోను ఇర్ఫాన్‌ తన ఇన్‌స్టాగ్రామ్‌లో పోస్ట్ చేశారు. ఈ ఫొటోకు 'షూటింగ్‌లో ఓ అందమైన ప్రాంతం'అని క్యాప్ష‌న్ ఇచ్చారు. చిత్రం బృందం మంచు ప్రాంతంలో చిత్రీకరణ జరుపుతుండడంతో.. ఇర్ఫాన్ వింట‌ర్  దుస్తుల్లో నిల‌బ‌డి ఉన్నాడు.

ఈ మూవీలో శ్రీనిధి శెట్టి, మియా జార్జ్ ప్రధాన పాత్రల్లో నటిస్తున్నారు. అజయ్ జ్ఞానముత్తు దర్శకత్వం వహిస్తున్నారు. లాక్‌డౌన్‌ నిబంధనలు పాటిస్తూ షూటింగ్ జ‌రుపుకోవ‌చ్చని ర‌ష్యా ప్ర‌భుత్వం అనుతించడంతో.. వారం క్రిత‌మే రష్యా వెళ్లింది 'కోబ్రా' టీం. ఈ షెడ్యూల్ లో మూవీకి సంబంధించిన కీలక సన్నివేశాలు చిత్రీకరిస్తున్నారు. ఇది ఇర్ఫాన్ కు మొద‌టి చిత్రం. ఈ మూవీలో స‌త్తా చాట‌డం ద్వారా సినీ కెరీర్ ను కంటిన్యూ చేయాల‌ని చూస్తున్నాడీ ఆల్ రౌండర్‌. మ‌రి, ఎలాంటి ఫ‌లితం వ‌స్తుందో చూడాలి.