కుక్కలతో ఆడుతూ గాయపడ్డ జో బైడెన్​.. పాదాలకు స్వల్పగాయం..!

ఇటీవలే అమెరికా అధ్యక్షుడిగా ఎన్నికైన జోబైడెన్​ కాలుకు స్వల్ప గాయమైంది. ఆయన తాను పెంచుకుంటున్న కుక్కలతో ఆడుతున్నప్పుడు స్వల్పంగా గాయపడ్డారు. ఆ తర్వాత పరీక్షలు నిర్వహించగా పాదానికి స్వల్పంగా పగులు ఏర్పడ్డట్టు వైద్యులు గుర్తించారు. కొంతకాలంపాటు ఆయన రెస్ట్​లో ఉండనున్నారు. జో బైడెన్​ పాదానికి సంబంధించిన ఎముకలకు వెంట్రుకమందం పగులు వచ్చినట్టు వైద్యులు నిర్ధారించారు. అయితే బైడెన్​ కు కొన్ని వారాలపాటు రెస్ట్​ అవసరమైని వాళ్లు సూచించారు. బైడెన్​ కాలు బెనకడంతో ఆయనకు వైద్యులు అన్నిరకాల పరీక్షలు నిర్వహించారు. ఆదివారం బైడెన్  చికిత్స కోసం ఆస్పత్రిలో చేరారు. ప్రస్తుతం ఆయనకు అమెరికాకు చెందిన ప్రముఖ ఆర్థోపెడిక్​ నిపుణులు  చికిత్స నందిస్తున్నారు.

ఎక్స్​రే రిపోర్ట్​లో ఆయన  ఎముక విరిగినట్టు కనిపించలేదు. అయితే మరికొన్ని పరీక్షలు చేయగా ఆయన  పాదంలోని ఎముకకు స్వల్ప పగులు ఉన్నట్టు గమనించామని వైద్యులు చెప్పారు. జో బైడెన్​ కొంతకాలం పాటు వాకర్​ సాయంతోనే నడిచే అవకాశం ఉన్నది. ఇటీవల జో బైడెన్ అమెరికా అధ్యక్షుడిగా ఎన్నికయ్యారు. చాలా కాలంపాటు మాజీ అధ్యక్షుడు డొనాల్డ్​ ట్రంప్​ తన  ఓటమిని అంగీకరించలేదు. అధికార బదలాయింపుకు ససేమిరా ఒప్పుకోలేదు. ఎన్నికల ప్రక్రియలో  అక్రమాలు జరిగాయని ఆరోపించారు.  ఈ విషయంపై కోర్టుకు కూడా వెళతానన్నారు.

కానీ కుటుంబసభ్యులు, రాజకీయ సలహాదారుల సూచనతో ఆయన వెనక్కి తగ్గారు.  అధికార బదలాయింపునకు అంగీకరించారు. దీంతో ప్రస్తుతం ఆ ఏర్పాట్లు జరుగుతున్నాయి. ఈ నేపథ్యంలో జో బైడెన్​ గాయపడ్డారు. అయితే జో బైడెన్​కు ప్రస్తుతం ఇబ్బంది ఏమి లేదని.. అయనకు అయ్యింది చిన్న గాయమే కాబట్టి తొందర్లోనే ఆయన కోలుకుంటారని వైద్యులు చెప్పారు.