డిగ్గీ రాజాకు కేటీఆర్ షాక్ ఇచ్చారు

ఏమాటకు ఆ మాటే చెప్పాలి మిగిలిన రాజకీయ కుటుంబాలు.. వారి కుటుంబ సభ్యులకు.. తెలంగాణ రాష్ట్ర ముఖ్యమంత్రి కేసీఆర్ ఫ్యామిలీ మెంబర్లకు చాలా తేడా ఉంది. సమకాలీన రాజకీయాల్లో కేసీఆర్ ఫ్యామిలీ మెంబర్స్ అంత యాక్టివ్ గా ఉండే రాజకీయ నేతలు పెద్దగా కనిపించరు. కొన్ని రాజకీయ కుటుంబాలు యాక్టివ్ గా ఉండొచ్చేమో కానీ.. కేసీఆర్ కుటుంబ సభ్యులకున్న దూకుడు.. ప్రత్యర్థులపై సెన్స్ బుల్ గా దాడికి దిగటం లాంటివి పెద్దగా కనిపించదు.

తెలంగాణ రాష్ట్ర ఆవిర్భావ దినోత్సవాన్ని పురస్కరించుకొని తెలంగాణ అధికారపక్షంపైనా.. ముఖ్యమంత్రి కేసీఆర్ పైనా కాంగ్రెస్ ముఖ్యనేతల్లో ఒకరైన దిగ్విజయ్ సింగ్ ట్విట్టర్ ను వేదికగా చేసుకొని విమర్శలు చేశారు. కేసీఆర్ ను నీరో చక్రవర్తిగా పోల్చటం దగ్గర నుంచి.. ఆయన మీద ఘాటు వ్యాఖ్యలు చేశారు. డిగ్గీ చేసిన విమర్శలకు ఒక్క చిన్న ట్వీట్ తో కేటీఆర్ సమాధానం చెప్పటమే కాదు.. ఆయన నోటి నుంచి మాట రాకుండా చేశారని చెప్పాలి.

కాంగ్రెస్ పార్టీ అధికార ప్రతినిధిగా వ్యవహరిస్తున్న దిగ్విజయ్ సింగ్ చేసిన ట్వీట్లలో ఒక ట్వీట్ లోని తప్పును ఎత్తి చూపిన కేటీఆర్ దెబ్బకు డిగ్గీ నోట మాట రాని పరిస్థితి. తెలంగాణ అనే పదాన్ని తప్పు స్పెల్లింగ్ తో రాసిన డిగ్గీ తప్పిదాన్ని ఎత్తి చూపిన మంత్రి కేటీఆర్.. తెలంగాణ అంటూ కరెక్ట్ స్పెల్లింగ్ తో రాయలేని నువ్వు తెలంగాణ రాష్ట్ర ముఖ్యమంత్రి కేసీఆర్ మీద విమర్శలు చేస్తారా? అంటూ ఎక్కడ తగలాలో అక్కడ తగిలేలా ట్వీట్ చేశారు. కేటీఆర్ ట్వీట్ చేసిన తర్వాత చాలానే ట్వీట్స్ చేసిన దిగ్విజయ్ సింగ్.. ఈ విషయం మీద మాత్రం పెదవి విప్పక పోవటం గమనార్హం.