కుమార‌స్వామి..ఓ వివాహం..వివాదం..అదృష్టం

అనేక ఉత్కంఠ ప‌రిణామాల మధ్య క‌న్న‌డ రాజ‌కీయాలకు ఫుల్ స్టాప్ ప‌డిన సంగ‌తి తెలిసిందే. ప్రాంతీయ పార్టీ అయిన జేడీఎస్ ర‌థ‌సార‌థి మిగ‌తా రెండు జాతీయ పార్టీల‌కంటే త‌క్కువ సీట్లు వ‌చ్చిన‌ప్ప‌టికీ...సీఎం అయ్యారు. త‌ద్వారా మ‌రోమారు అంద‌రి దృష్టిని ఆక‌ర్షించారు. కుమార‌స్వామి జీవితం అనేక ఆస‌క్తిక‌ర‌మైన ప‌రిణామాల‌కు వేదిక కావ‌డం విశేషం. అదృష్టం..వివాహం...వివాదం ఇలా కీల‌క అంశాల‌న్నీ సినీ నిర్మాత నుంచి సీఎంగా ఎదిగిన కుమార‌స్వామి జీవితంలో భాగం అయ్యాయి. మాజీ ప్రధాని దేవెగౌడ దంపతులకు 1959 డిసెంబర్ 16న జన్మించిన కుమారస్వామి బెంగళూరులోని నేషనల్ కాలేజీలో బీఎస్సీ చదివారు. హెచ్‌ డీ కుమారస్వామి రాజకీయాల్లోకి రాకముందు సినీ నిర్మాతగా - డిస్ట్రిబ్యూటర్‌ గా వ్యవహరించారు. 1996 ఎన్నికల్లో కనకపుర స్థానం నుంచి తొలిసారి విజయం సాధించడంతో కుమారస్వామి రాజకీయ అరంగ్రేటం చేసినా.. 1998 లోక్‌ సభ మధ్యంతర ఎన్నికలు, 1999 అసెంబ్లీ ఎన్నికల్లోనూ ఓటమి పాలయ్యారు. 2004లో రామనగర స్థానం నుంచి గెలుపొందారు.


కాగా కుమార‌స్వామి వైవాహిక జీవితం వివాదాల్లో ప‌డింది. 1986 మార్చి మూడో తేదీన అనితను వివాహం చేసుకున్నారు. వారిద్దరికి నిఖిల్ గౌడ అనే కొడుకు ఉన్నారు. 2006లో కన్నడ నటి రాధికను కూడా ఆయన రెండో పెళ్లి చేసుకున్నారు. వారికి షామికా కే స్వామి అనే కూతురు ఉన్నది. ఆయన రెండో పెండ్లిపై కేసు దాఖలైనా ఆధారాల్లేవని కర్ణాటక హైకోర్టు కొట్టేసింది.