కాంగ్రెస్ విజయంపై నటీమణి పూర్తి విశ్వాసంతో!

జాతీయ స్థాయిలో కాంగ్రెస్ పార్టీ ఘన విజయం సాధించి ప్రభుత్వాన్ని ఏర్పాటు చేయడం ఖాయమని అంటోంది నటీమణి కుష్బూ. తను వివిధ ప్రాంతాల్లో ప్రచారానికి వెళ్లినట్టుగా.. అక్కడంతా తనకు బీజేపీ మీద తీవ్రమైన వ్యతిరేకత కనిపించినట్టుగా ఈ నటీమణి చెప్పుకొచ్చారు. మోడీకి - బీజేపీకి ఓటమి ఖరారు అయ్యిందని.. దేశ ప్రజలు  మళ్లీ కాంగ్రెస్ కు అధికారం అప్పగించేందుకు రెడీగా ఉన్నారని కుష్బూ చెప్పుకొచ్చారు!

తమ పార్టీకి అధికారం దక్కడం ఖాయమని ఈ నటీమణి ఇలా విశ్వాసం వ్యక్తం చేశారు. తమిళనాట కాంగ్రెస్ పార్టీ తరఫున ఈమె అధికార ప్రతినిధిగా ఉన్న సంగతి తెలిసిందే. దక్షిణాదిన ఒకప్పుడు హీరోయిన్ గా వెలుగు వెలిగిన ఈమెను పక్క రాష్ట్రాల కాంగ్రెస్ వాళ్లు కూడా ప్రచారానికి తీసుకెళ్లారు. అలా తను అన్ని చోట్లా పర్యటించినట్టుగా కుష్బూ చెప్పుకొచ్చారు.

తను ఏపీ - తెలంగాణ - తమిళనాడు - కర్ణాటక - కేరళల్లో తిరిగినట్టుగా.. అన్ని చోట్లా మోడీపై ఒకే స్థాయిలో వ్యతిరేకత ఉందని కుష్బూ చెప్పుకొచ్చారు. తను ఢిల్లీలో కూడా ఎన్నికల ప్రచారానికి వెళ్తున్నట్టుగా కుష్బూ ప్రకటించారు. ఇక  తమిళనాడులో కాంగ్రెస్ కూటమి విజయం పట్ల ఈమె ధీమాను వ్యక్తం చేశారు.

ఆ రాష్ట్రంలో కాంగ్రెస్- డీఎంకే కలిసి పోటీ చేసిన సంగతి తెలిసిందే. తమ కూటమికి ముప్పై ఐదు నుంచి ముప్పై ఆరు  ఎంపీ సీట్లు ఖాయంగా దక్కుతాయని ఈ నటీమణి వ్యాఖ్యానించారు. తమిళనాట బీజేకి భంగపాటు తప్పదని, బీజేపీ తమిళనాడు నేత తమిళ సై చిత్తుగా ఓడిపోతారని, ఆమెకు నోటా కంటే కాస్త ఎక్కువ ఓట్లు రావొచ్చని కుష్బూ అన్నారు. మరి ఈ నటీమణి అంచనాలు ఎంత వరకూ నిజం అవుతాయో!