తెలంగాణకు మోడీ ప్రోగ్రాం ఫిక్స్ అయినట్లేనా?

తెలంగాణ రాష్ట్రంలో ప్రభుత్వం ఏర్పడి 21 నెలలు అవుతున్నా.. ఇప్పటివరకూ ప్రధాని మోడీ రాష్ట్రంలో పర్యటించలేదని.. పెద్దన్నలా వ్యవహరించాల్సిన కేంద్రం.. తమను పట్టించుకోవటం లేదంటూ తెలంగాణ అధికారపక్ష నేతలు చేస్తున్న విమర్శలు ప్రధాని మోడీ వరకూ వెళ్లాయా? తమను పట్టించుకోవటం లేదని.. తమ రాష్ట్రం విషయంలో నిర్లక్ష్యం చేస్తున్నారంటూ ఎంపీ కవిత మొదలుకొని తెలంగాణ అధికారపక్ష నేతలు తరచూ చేస్తున్న వ్యాఖ్యలకు తెర దించుతూ ప్రధాని మోడీ తెలంగాణ పర్యటన ఖరారైందా? అంటే దాదాపుగా అన్న మాట వినిపిస్తోంది.

ఫిబ్రవరి13న తెలంగాణ రాష్ట్రానికి వస్తున్న ప్రధాని మోడీ ఈ సందర్భంగా పలు కార్యక్రమాల్లో పాల్గొనే అవకాశం ఉంది. వరంగల్ లోని గిరిజన వర్సిటీ.. కాళోజీ హెల్త్ వర్సిటీ.. టెక్స్ టైల్ పార్క్ శంకుస్థాపన కార్యక్రమాల్లో ప్రధాని పాల్గొనే అవకాశం ఉందని చెబుతున్నారు. అయితే.. ఈ ప్రోగ్రాం పక్కా అని చెప్పకున్నా.. ఫిబ్రవరి 13కు తెలంగాణ వచ్చే అవకాశం ఉందని చెబుతున్నారు. ప్రధాని ప్రోగ్రాం ఫిక్స్ అయిన నేపథ్యంలో.. తెలంగాణకు మోడీ రావటం లేదన్న విమర్శను టీఆర్ ఎస్ నేతలు వదిలేస్తారో? లేదో?