నయీం సినీ లింకులను బయటపెట్టిన నట్టికుమార్!!

 నయీం వ్యవహారం తెలంగాణ రాజకీయ - పోలీసు వర్గాలను ఇప్పటికే ముచ్చెమటలు పట్టిస్తోంది. తాజాగా సినీ నిర్మాత నట్టికుమార్ చేసిన సంచలన వ్యాఖ్యలతో సినీ ఇండస్ర్టీ కూడా గడగడలాడుతోంది.  నయీంతో టాలీవుడ్‌ కు లింకులున్నాయని  నట్టికుమార్ చెప్పడమే కాకుండా పలువురి పేర్లు కూడా వెల్లడించారు. నిర్మాతలు సి. కల్యాణ్ - అశోక్‌ కుమార్ - బండ్ల గణేష్‌.. పలు తెలుగు చిత్రాల్లో హీరోగా నటించిన ముంబయికి చెందిన సచిన్‌ జోషికు కూడా నయీంతో సంబంధాలున్నాయని ఆయన ఆరోపించారు. నయీంకు కొంతమంది సినీ పెద్దలు కూడా సహకరించారని నట్టి ఆరోపించారు. పూర్తి వివరాలను సాక్ష్యాలతో సహా త్వరలో సిట్‌ కు అందజేస్తానన్నారు.

ఈ రోజు మీడియాతో మాట్లాడిన నట్టి కుమార్ సినిమా ఇండస్ట్రీలో గుబులు రేపారు. నయీంతో సంబంధాలున్నాయని నిర్మాతలపై ఆరోపణలు చేయడమే కాకుండా థియేటర్లలో క్యాంటిన్ వ్యాపారం మొత్తం నయీం చేతుల్లోనే ఉందన్న కొత్త విషయం చెప్పారు. నర్సంపేటలోని తన థియేటర్‌ ను నయీం అనుచరులు బలవంతంగా లాక్కుతున్నారని నట్టికుమార్ చెప్పారు. కోటి రూపాయల విలువ చేసే థియేటర్‌ ను కేవలం రూ. 25లక్షలు ఇచ్చి లాక్కున్నారని ఆరోపించారు.  ఈ విషయంపై ఏపీ పోలీసులతో పాటు మంత్రి అచ్చెన్నాయుడు కలిసి చెప్పానని.. వారు ఏమాత్రం పట్టించుకోలేదని ఆరోపించారు.

కాగా సచిన్ జోషితో నయీంకు సంబంధాలున్నాయనడంతో నయీంకు ముంబయిలోనూ లింకులు భారీగా ఉండొచ్చన్న అనుమానాలు వ్యక్తమవుతున్నాయి. సచిన్ జోషి ముంబయిలో ప్రముఖ గుట్కా వ్యాపార కుటుంబానికి చెందినవారు. దీంతో నయీం ఆయన సహాయంతో ముంబయిలోనూ విస్తరించి ఉంటారని పోలీసులు భావిస్తున్నారు.
Full View