ఆసుప‌త్రికి బాబు.. మెడిక‌ల్ చెక‌ప్ కేన‌ట‌!

అధికారం చేతిలో ఉండే ఆ హ‌డావుడే వేరు. ప‌వ‌ర్ పోయాక‌.. ఎలాంటి ప‌రిస్థితి ఉంటుంద‌న‌టానికి తాజా ప‌రిణామాల్ని చెప్పుకోవ‌చ్చు. నిన్న సాయంత్రం ఏపీ మాజీ ముఖ్య‌మంత్రి చంద్ర‌బాబు విజ‌య‌వాడ నుంచి హైద‌రాబాద్ కు వ‌చ్చారు. శంషాబాద్ ఎయిర్ పోర్ట్ లో ఆయ‌న్ను క‌లిసేందుకు వ‌చ్చిన టీడీపీ నేత‌లు పెద్ద‌గా లేరు. న‌గ‌రానికి చెందిన నేత ఒకరు బాబుకు స్వాగ‌తం చెప్పినోళ్ల‌లో ఉన్నారు. ఇదంతా ఒక ఎత్తు అయితే.. ఈ రోజు ఉద‌యాన్నే మెడిక‌ల్ చెక‌ప్ కోసం బాబు ఆసుప‌త్రికి వెళ్ల‌టం ఆస‌క్తిక‌రంగా మారింది.

సిటీలోని గ‌చ్చిబౌలిలో ఉన్న‌ ఏషియ‌న్ గాస్ట్రోల‌జి ఆసుప‌త్రికి చెక‌ప్ కోసం వెళ్లిన‌ట్లుగా తెలుస్తోంది. అక్క‌డే సుమారు గంట పాటు ఉన్న చంద్ర‌బాబుకు మెడిక‌ల్ చెక‌ప్ లు చేశార‌ని చెబుతున్నారు. అనంత‌రం ఆయ‌న జూబ్లీహిల్స్ లోని త‌న నివాసానికి చేరుకున్నారు. ఇదిలా ఉంటే.. బాబు హైద‌రాబాద్ కు వ‌చ్చిన విష‌యాన్ని తెలుసుకున్న ప‌లువురు టీడీపీ నేత‌లు ఆయ‌న ఇంటికి వెళ్లారు. బాబును క‌లిసిన వారిలో సీనియ‌ర్ నేత‌లు జేసీ దివాక‌ర్ రెడ్డి.. ఎల్ ర‌మ‌ణ‌.. రావుల చంద్ర‌శేఖ‌ర్ రెడ్డి. త‌దిత‌రులు ఉన్నారు. బాబు యోగ‌క్షేమాల్నిఅడిగి తెలుసుకున్నారు. ఈ నేప‌థ్యంలో రెండు రాష్ట్రాల్లోని రాజ‌కీయాల ప‌రిస్థితుల గురించి అడిగి తెలుసుకున్న‌ట్లుగా తెలుస్తోంది. రోటీన్ చెక‌ప్ ల్లో భాగంగానే బాబు ఆసుప‌త్రికి వెళ్లిన‌ట్లుగా తెలుస్తోంది.