గూబ‌ల‌దిరిపోతున్న టికెట్ల ధ‌ర‌లు.. జేబులు ఖాళీ.. ఏం జ‌రిగింది?

వ‌న్డే ప్రపంచ క‌ప్ ఫైన‌ల్ పోటీ.. మ‌రో రెండు రోజుల్లో ఆదివారం జ‌ర‌గ‌నుంది. ప్ర‌ధాని న‌రేంద్ర మోడీ సొంత రాష్ట్రం గుజ‌రాత్‌లోని అహ్మ‌దాబాద్‌లో రెండేళ్ల కింద‌ట నిర్మించిన 'న‌రేంద్ర మోడీ స్టేడియం'లో ఈ ఫైన‌ల్ పోటీ జ‌ర‌గ‌నుంది. పైగా.. ఈ ఫైన‌ల్స్‌లో రెండు దిగ్గజ దేశాలు(భార‌త్‌-ఆస్ట్రేలియా) పోటీ ప‌డుతుండ‌డంతో మ‌రింతగా ఉత్కంఠ పెరిగిపోయింది. దీంతో ఎక్క‌డెక్క‌డి నుంచో క్రికెట్ ప్రియులు ఈ ఫైన‌ల్ మ్యాచ్‌ను వీక్షించేందుకు.. క్యూ క‌డుతున్నారు.

పైగా.. న‌రేంద్ర మోడీ స్టేడియంలో 1,36000 మంది ఒకే సారి కూర్చుని వీక్షించే ఏర్పాటు ఉంది. అంతేకాదు.. అధునాత‌న సౌక‌ర్యాలు కూడా సొంతం. ఎక్క‌డిక‌క్క‌డ స్క్రీన్స్ కూడా ఉంటాయి. దీంతో ఈ వేదిక నుంచి ప్ర‌త్య‌క్షంగా ఫైన‌ల్ మ్యాచ్‌ను వీక్షించాల‌ని క్రికెట్ ప్రియులు కోరుకుంటున్నారు. అయితే.. వీరి వీక్ నెస్‌ను, వ‌న్డే క్రికెట్ ఫైనల్స్‌కు పెరిగిన డిమాండ్‌ను త‌మ‌కు అనుకూలంగా మార్చేసుకున్నారు.. స్థానిక హోట‌ల్ య‌జ‌మానులు, విమాన యాజ‌మాన్యాలు.

+ సాధార‌ణ హోట‌ళ్ల‌లోనే ఒక్క‌ రాత్రి బ‌స చేసేందుకు రూ.10 వేలు వ‌సూలు చేస్తున్నారు. ముందుగానే బుక్ చేసుకోవాలి. ఇప్ప‌టికే అహ్మ‌దాబాద్ న‌గ‌రంలో హోట‌ళ్లు హౌస్ ఫుల్ బోర్డులు పెట్టేశాయి.

+ అహ్మ‌దాబాద్‌లోని స్టార్ హోట‌ళ్ల‌లో రోజుకు రూ.ల‌క్ష చొప్పున వ‌సూలు చేస్తున్నారు. దీనికి జీఎస్టీ అద‌నం. ఇవి కూడా దాదాపు నిండిపోయాయి.

+ ఇక‌, న‌వంబ‌రు 18-19 తేదీల్లో ముంబై నుంచి అహ్మ‌దాబాద్‌కు వెళ్లే విమానాల చార్జీలు ఏకంగా రూ.50 వేలు ప‌లుకుతున్నాయి. సాధార‌ణ రోజుల్లో ఇవి 22 వేలు.

+ ఢిల్లీ నుంచి అహ్మ‌దాబాద్‌కు రూ.40 వేలు. హైద‌రాబాద్ నుంచి రూ.35 వేలు చొప్పున విమాన చార్జీలు వ‌సూలు చేస్తున్నారు. ఇవి మ‌రింత పెరిగే అవ‌కాశం ఉంద‌ని అంటున్నారు.