100 కోట్లు కొట్టినా.. సౌండ్ లేదేంటి?

ఒకప్పుడు సినిమా రంగంలో సక్సెస్ అనేది సెంటర్ల మీద ఆధారపడి ఉండేది. కానీ, ఇప్పుడు అవి వసూలు చేసే కలెక్షన్లను డిసైడ్ అవుతుంటుంది. ఒక్కోసారి టాక్‌ బాలేకపోయినా సినిమాలు హిట్ అవుతుంటాయి. ఒక్కోసారి టాక్ బాగున్నా మూవీలు డిజాస్టర్లుగా మారుతుంటాయి. ఏది ఏమైనా ప్రతి సినిమా యూనిట్ సక్సెస్ మీట్ మాత్రం పెట్టుకుంటూనే ఉంటోంది. అలాంటిది తాజాగా ఓ మూవీ మాత్రం దీన్ని పక్కన పెట్టేసింది. అదే 'అమరన్'.

కోలీవుడ్ టాలెంటెడ్ హీరో శివ కార్తికేయన్ హీరోగా రాజ్‌కుమార్ పెరియస్వామి రూపొందించిన చిత్రమే 'అమరన్'. మేజర్ ముకుంద్ వరదరాజన్ నిజ జీవిత కథతో తెరకెక్కిన ఈ చిత్రం ఆరంభంలోనే అందరి దృష్టిని లాక్కుంది. అందుకు తగ్గట్లుగానే అంచనాలను ఏర్పరచుకుని దీపావళి పండుగ సందర్భంగా అక్టోబర్ 31వ తేదీన అత్యధిక థియేటర్లలో విడుదల అయింది.

రియల్ స్టోరీతో వచ్చిన 'అమరన్' సినిమాను మొదటి ఆట నుంచే తమిళంతో పాటు తెలుగులోనూ ప్రేక్షకుల నుంచి అదిరిపోయే టాక్ కూడా లభించింది. దీనికి తగ్గట్లుగానే ఈ మూవీ విజయవంతంగా ప్రదర్శితం అవుతోంది. ఫలితంగా కేవలం మూడు రోజుల్లోనే శివ కార్తికేయన్ సినిమా ఏకంగా రూ. 107 కోట్లు గ్రాస్ వసూళ్లను సాధించి సత్తా చాటింది. దీంతో ఈ యంగ్ హీరో కెరీర్‌లో ఈ మార్క్ దాటిన మూడో సినిమాగా నిలిచింది.

'అమరన్' సినిమాకు తమిళంలో కంటే తెలుగులో అద్భుతమైన స్పందన దక్కుతోంది. దీంతో ఈ చిత్రం ఆంధ్రప్రదేశ్, తెలంగాణలో వరుసగా మూడు రోజుల్లో రూ. 2.81 కోట్లు, రూ. 2.21 కోట్లు, రూ. 2.02 కోట్లు వసూలు చేసింది. అలా రూ. 7.04 కోట్లు షేర్‌తో పాటు రూ. 12 కోట్లు గ్రాస్‌ను వసూలు చేసింది. ఫలితంగా రూ. 5.50 కోట్ల టార్గెట్‌తో వచ్చిన ఈ చిత్రం హిట్ స్టేటస్‌ను చేరుకోవడంతో పాటు రూ. 1.54 కోట్లు లాభాలను కూడా సొంతం చేసుకుంది.

తెలుగులో మూడు రోజుల్లోనే బ్రేక్ ఈవెన్ సాధించినా 'అమరన్' మూవీ యూనిట్ మాత్రం సక్సెస్ మీట్‌ను నిర్వహించలేదు. దీంతో ఇప్పుడిది హాట్ టాపిక్ అవుతోంది. సక్సెస్ కాకున్నా పార్టీలు చేసే ఈరోజుల్లో విజయాన్ని అందుకున్న సినిమాను లైట్ తీసుకోవడం చాలా మందిని ఆశ్చర్యపరుస్తోంది. అయితే, దీనికి కారణం శివ కార్తికేయన్, సాయి పల్లవి అందుబాటులో లేకపోవడమే అని ఓ టాక్ వినిపిస్తోంది. మరి రానున్న రోజుల్లో అయినా 'అమరన్' టీమ్ తెలుగులో సక్సెస్ మీట్ పెడుతుందో లేదో చూడాలి.

శివ కార్తికేయన్, సాయి పల్లవి జంటగా నటించిన 'అమరన్' సినిమాను రాజ్ కమల్ ఫిల్మ్స్ ఇంటర్నేషనల్, సోనీ పిక్చర్స్ ఫిల్మ్స్ ఇండియా బ్యానర్లపై కమల్ హాసన్, మహేంద్రన్, వివేక్‌లు నిర్మించారు. ఇందులో భువన్ అరోరా, రాహుల్ బోస్, శ్రీ కుమార్ తదితరులు నటించారు. జీవీ ప్రకాశ్ కుమార్ మ్యూజిక్ అందించాడు.