అంబానీ పెళ్లి: క్రూయిజ్ పార్టీలో వినోదం ప్యాకేజీ 100 కోట్లు!

రాధిక మర్చంట్ - అనంత్ అంబానీ రెండో ప్రీ వెడ్డింగ్ పార్టీ కోసం 1000 కోట్లు ఖ‌ర్చు చేస్తున్నార‌ని ప్ర‌చారం సాగుతోంది. గుజ‌రాత్ జామ్ న‌గ‌ర్‌లో మొద‌టి ప్రీవెడ్డింగ్ కోసం 1000కోట్లు ఖ‌ర్చు చేసిన అంబానీలు ఇప్పుడు మ‌రో 1000కోట్లు ఖ‌ర్చు చేస్తుండ‌గా, ముంబై జియో సెంట‌ర్‌లో పెళ్లి కోసం భారీ మొత్తం ఖ‌ర్చు చేస్తార‌ని ఊహాగానాలు సాగుతున్నాయి. ఇంత‌లోనే క్రూయిజ్ పార్టీలో ప్రదర్శన ఇవ్వడానికి షకీరా, కాటి పెర్రీ, పిట్‌బుల్ స‌హా ఇత‌ర గాయ‌నీగాయ‌కులు, సెల‌బ్రిటీ పెర్ఫామ‌ర్లు ఎంత వసూలు చేస్తున్నారో వెల్ల‌డిస్తూ జాతీయ మీడియాలు క‌థ‌నాలు రాసాయి.

తాజా స‌మాచారం మేర‌కు ఈ రెండవ ప్రీ-వెడ్డింగ్ వేడుకలో కాటి పెర్రీ, షకీరా, పిట్‌బుల్ వేదికపై ప్ర‌ద‌ర్శ‌న ఇస్తున్నారు. ఇప్ప‌టికే కేటిపెర్రీ స‌హా బ్యాక్‌స్ట్రీట్ బాయ్స్ క్రూయిజ్‌లో ప్రదర్శన ఇస్తున్న వీడియోలు కూడా వైరల్ అవుతున్నాయి. క్రూయిజ్ పార్టీలో ప్రదర్శన ఇచ్చినందుకు కాటి పెర్రీ ఫీజు సుమారు 10 కోట్లు ఉంటుంద‌ని అంచ‌నా. ది సన్ నివేదిక‌ ప్రకారం, `ఐ కిస్డ్ ఎ గర్ల్` వంటి హిట్ పాట‌లతో పాపుల‌రైన‌ కాటి పెర్రీ ఇలాంటి వేడుక‌ల‌కు భారీ మొత్తాలు వ‌సూలు చేస్తున్నార‌ని స‌మాచారం. అంబానీ ప్రీ వెడ్డింగ్ క్రూయిజ్‌లో ... ఐదు గంటల పాటు జరిగే పార్టీలో కేటీ ప్రధాన ఆకర్షణగా నిలుస్తోంది.

పార్టీలో ప్రదర్శన ఇచ్చినందుకు షకీరా ఫీజు అంతే భారీ మొత్తంలో ఉంది. `హిప్స్ డోంట్ లై` పాట స‌హా ఎన్నో అద్భుత ప్ర‌ద‌ర్శ‌న‌ల‌తో అల‌రించిన‌ కొలంబియన్ సంచలనం ష‌కీరా ఈ ప్రీవెడ్డింగ్ ఉత్సవాల్లో తన చార్ట్-టాపింగ్ హిట్‌లతో అతిథులకు ట్రీట్ ఇవ్వ‌నుంద‌ని స‌మాచారం. ది హోలా నివేదిక‌ ప్రకారం... ష‌కీరా తన నటనకు రూ.10 కోట్ల నుండి రూ.15 కోట్ల వరకు ప్యాకేజీ వసూలు చేస్తుంది.

క్రూయిజ్ పార్టీలో ప్రదర్శన కోసం పిట్‌బుల్ ఫీజు కోట్ల‌లో ఉంది. ఈవెంట్‌లో అమెరికన్ రాపర్ ప్రదర్శనకు ఖచ్చితంగా ఇంత అని తెలియ‌క‌పోయినా కానీ.. అతడి ప్ర‌ద‌ర్శ‌న‌ వ్యవధి .. ప్రొడక్షన్ ఖర్చులు వంటి అంశాల ఆధారంగా అతడు ప్రైవేట్ షోల కోసం $500,000 (రూ. 4 కోట్లు) .. $749,000 (రూ. 6.25 కోట్లు) వరకు వసూలు చేసినట్లు నివేదికలు సూచిస్తున్నాయి. .

రాధిక-అనంత్ అంబానీల క్రూయిజ్ పార్టీలో బ్యాక్‌స్ట్రీట్ బాయ్స్ ప్రదర్శన ఇస్తుండ‌డం ఆస‌క్తిని క‌లిగిస్తోంది. గురువారం ఇటలీలో విహారయాత్రలో బ్యాక్‌స్ట్రీట్ బాయ్స్ ప్రదర్శన ఇస్తున్న వీడియో ఆన్‌లైన్‌లో క‌నిపించింది. వైట్ అండ్ వైట్ దుస్తులు ధరించి వారి హిట్ పాట `ఐ వాన్నా బీ విత్ యు`తో ప్రేక్షకులను అలరించారు.