భోళా పుకార్లు.. నిర్మాత అఫిషియల్ క్లారిటీ!

మెగాస్టార్ చిరంజీవి భోళా శంకర్ సినిమా ఫలితం అభిమానులకు మాత్రమే కాకుండా సినిమా ఇండస్ట్రీలోని చాలామందికి ఆశ్చర్యాన్ని కలిగించింది. సినిమా దారుణంగా దెబ్బ కొట్టడంతో నిర్మాతకు చాలా నష్టాలు కలుగుతున్నట్లుగా చాలా రకాల కథనాలు వచ్చాయి. దాదాపు 50 కోట్ల రేంజ్ లోనే నిర్మాత ఈ సినిమాతో నష్టపోతున్నట్లుగా సోషల్ మీడియాలో కొన్ని గాసిప్స్ కూడా వస్తున్నాయి.

అంతేకాకుండా మెగాస్టార్ చిరంజీవి పారితోషికం విషయంలో కూడా అనిల్ సుంకరతో మాట్లాడారు అని, బ్యాలెన్స్ మొత్తం తిరిగి ఇవ్వాలి అని ఆయన గట్టిగా చెప్పినట్లు కూడా కొన్ని పుకార్లు వచ్చాయి. అయితే అందులో నిజం లేదు అని అప్పటికే కొంతమంది మెగా సన్నిహిత వర్గాలు తేల్చి చెప్పేశాయి. ఇక మొదటిసారి ఈ విషయంపై నిర్మాత అనిల్ సుంకర సోషల్ మీడియా ద్వారా అధికారికంగా క్లారిటీ ఇచ్చే ప్రయత్నం చేశారు.

అనిల్ సుంకర ఈ విధంగా వివరణ ఇస్తూ.. పుకార్లు కొంతమంది వ్యక్తులకు క్రూరమైన వినోదంగా సంతృప్తిగా అనిపించవచ్చు, కానీ యుగయుగాలుగా కష్టపడి నిర్మించుకున్న ప్రతిష్టను దెబ్బతీయడం అనేది ఆమోదయోగ్యం కాని నేరం. ఇది ఎవ్వరికీ మంచిది కాదు. నాకు, చిరంజీవిగారికి మధ్య జరిగిన వివాదం గురించి ప్రచారంలో ఉన్న వార్త పూర్తిగా చెత్త. అందులో నిజం లేదు.

ఆయన పూర్తిగా నాకు మద్దతు ఇచ్చారు. ఆయన నాతో చాలా మంచి సంబంధాలు కలిగి ఉన్నాడు. దయచేసి ఇలాంటి ద్వేషాపూరితమైన వార్తలను నమ్మకండి. నకిలీ వార్తలను సృష్టించడం కొంతమందికి సాధారణ వినోదంగా ఉండవచ్చు, కానీ అలా చేసిన ప్రతి ఒక్కరికీ చిక్కులు కలిగిస్తుంది. ఈ పరిస్థితిలో అండగా ఉన్న పరిశ్రమలోని నా శ్రేయోభిలాషులందరికీ ధన్యవాదాలు.

వారి అందరి ఆశీస్సులతో తిరిగి బలంగా రావాలని కోరుకుంటున్నాను.. అని అనిల్ సుంకర వివరణ ఇచ్చారు.