అంజలికి అదృష్టం కలిసి వస్తుందా..?

2006 లో ఫోటో సినిమాతో తెలుగు తెరకు పరిచయమైన రాజోలు అమ్మాయి అంజలి ఆ సినిమా తర్వాత తమిళంలో వరుస సినిమాలు చేసి మెప్పించింది. తమిళ, కన్నడ, మలయాళ భాషల్లో నటించిన తర్వాత మళ్లీ 2013లో సీతమ్మ వాకిట్లో సిరిమల్లె చెట్టు సినిమాతో తెలుగులో చేసింది. ఆ సినిమాలో సీత పాత్రకు అంజలి అభినయం ప్రేక్షకులను బాగా మెప్పించింది. ఆ తర్వాత రవితేజ బలుపు చేసిన అంజలి ఆ సినిమాతో కూడా హిట్ అందుకుంది.

తెలుగులో చేస్తూనే తమిళంలో కూడా నటిస్తూ వచ్చింది అంజలి. 2014లో గీతాంజలి సినిమాలో నటించిన అంజలి ఆ సినిమాతో హిట్ అందుకుంది. అంతకుముందు మసాలా మూవీలో కూడా చేసింది. తెలుగులో స్పెషల్ సాంగ్స్ లో కూడా చేస్తూ వచ్చిన అంజలి లేటెస్ట్ గా గీతాంజలి మళ్లీ వచ్చిందితో ప్రేక్షకుల ముందుకు రాబోతుంది. 10 ఏళ్ల క్రితం వచ్చిన గీతాంజలి సినిమాకు సీక్వెల్ గా ఈ సినిమా వస్తుంది.

కోనా వెంకట్ నిర్మించిన ఈ సినిమాలో అందులో నటించిన వారంతా ఈ సినిమాలో ఉన్నారు. ఈ సినిమా ప్రచార చిత్రాలు ప్రేక్షకులను అలరిస్తున్నాయి. త్వరలో రిలీజ్ కాబోతున్న ఈ సినిమాపై అంజలి భారీ హోప్స్ పెట్టుకుంది. అంజలి నటించిన 50వ సినిమాగా గీతాంజలి మళ్లీ వచ్చింది క్రేజ్ తెచ్చుకుంది.

అయితే ఈ సినిమాతో పాటుగా విశ్వక్ సేన్ గ్యాంగ్స్ ఆఫ్ గోదావరిలో కూడా ఛాన్స్ అందుకుంది అంజలి. ఆ సినిమాతో కూడా అమ్మడు మరోసారి ప్రేక్షకుల దగ్గరకు చేరే అవకాశం ఉంటుంది. వీటితో పాటుగా రాం చరణ్ గేమ్ చేంజర్ లో కూడా అంజలి ఛాన్స్ అందుకుంది. తెలుగు అమ్మాయిగా ముందు తమిళంలో సత్తా చాటిన అంజలి మళ్లీ ఇప్పుడు వరుస తెలుగు సినిమాలతో తిరిగి ఫాం లోకి వస్తుంది. తనదైన శైలిలో నటిస్తూ మెప్పిస్తున్న అంజలి సరైన సినిమా పడితే మళ్లీ తన సత్తా చాటుతుందని ప్రూవ్ చేస్తుంది. మరి రాబోతున్న అంజలి సినిమాలు ఆమె కెరీర్ కు ఎంత హెల్ప్ అవుతాయన్నది చూడాలి.

హర్రర్ థ్రిల్లర్ జోనర్ లో ఎంటర్టైనర్ గా రాబోతున్న గీతాంజలి మళ్లీ వచ్చింది సినిమా మరోసారి ప్రేక్షకులను నవ్విస్తూ భయపెట్టించేందుకు వస్తుంది. ఈ సినిమా ట్రైలర్ తోనే సినిమాపై హైప్ ఏర్పడేలా చేశారు మేకర్స్. గీతాంజలి హిట్ అంజలి కెరీర్ కి హెల్ప్ అవ్వగా 10 ఏళ్ల తర్వాత గీతాంజలి మళ్లీ వచ్చింది ఈ సీక్వెల్ మరోసారి అంజలికి బూస్టింగ్ ఇస్తుందేమో చూడాలి.