స్వీటీ ఫ్యాన్స్ కు గుడ్ న్యూస్.. 'ఘాటీ' అప్డేట్!

సౌత్ స్టార్ హీరోయిన్ అనుష్క శెట్టి తన కెరీర్ లో 50 సినిమాల మైలురాయికి చేరువైంది. 'మిస్ శెట్టి మిస్టర్ పోలిశెట్టి' వంటి బ్లాక్ బస్టర్ తర్వాత చాలా గ్యాప్ తీసుకున్న స్వీటీ.. ఇప్పుడు వరుస సినిమాలతో అలరించడానికి రెడీ అయింది. ఇందులో భాగంగా క్రిష్ జాగర్లమూడి దర్శకత్వంలో ''ఘాటీ'' అనే మూవీ చేస్తోంది. అయితే ఈ మూవీ అప్డేట్ కోసం ఆసక్తిగా ఎదురు చూస్తున్న అభిమానులకు తాజాగా ఓ గుడ్ న్యూస్ అందింది. మరో నాలుగు రోజుల్లో సినిమా షూటింగ్ అంతా పూర్తవుతుందని, ఫస్ట్ లుక్ ను విడుదల చేయబోతున్నట్లుగా మేకర్స్ తెలిపారు.

నవంబర్ 7వ తేదీన అనుష్క తన 43వ పుట్టినరోజును జరుపుకోనుంది. ఈ సందర్భాన్ని పురస్కరించుకుని మేకర్స్ ఆమెకు విషెస్ అందజేస్తూ రెండు అప్డేట్లతో రాబోతున్నారు. ఫస్ట్ లుక్ తో పాటిగా 'ఘాటీ' వరల్డ్ లోకి తీసుకెళ్లే స్పెషల్ గ్లిమ్ప్స్ ను కూడా రిలీజ్ చేయబోతున్నట్లు సోషల్ మీడియాలో ప్రకటించారు. ''రాణి తన సింహాసనాన్ని తిరిగి పొందేందుకు వస్తోంది. మరో నాలుగు రోజుల్లో క్వీన్ అనుష్కశెట్టి బర్త్ డేకి 4 రోజులు మిగిలి ఉన్నాయి. అదే నాలుగు రోజుల్లో ఈ సినిమా షూటింగ్ జర్నీ ముగియనుంది. మ్యాజిక్ కోసం చూస్తూ ఉండండి'' అని పేర్కొన్నారు.

'వేదం' తర్వాత అనుష్క, డైరెక్టర్ క్రిష్ కాంబినేషన్ లో రాబోతున్న సినిమా 'ఘాటీ'. ఇదొక విమెన్ సెంట్రిక్ మూవీ. వేదంలో అనుష్కను వేశ్యగా చూపించి అందరినీ ఆశ్చర్యపరిచిన దర్శకుడు.. ఇప్పుడు అంతకు మించి ఆమెను ఒక పవర్ ఫుల్ లేడీ పాత్రలో ప్రజెంట్ చేయబోతున్నట్టు తెలుస్తోంది. ఇది అనుకోని పరిస్థితుల్లో నేరస్తురాలిగా మారిన ఓ బాధితురాలి కథ అని.. పగ, ప్రతీకారం యొక్క గ్రిప్పింగ్ స్టోరీని వివరిస్తుందని ప్రచారం జరుగుతోంది. ఇందులో అనుష్క పాత్ర చాలా రఫ్ గా వుంటుందని, ఒక రకంగా క్వీన్ ఆఫ్ సౌత్ అనే విధంగా ఉంటుందని టాక్.

'ఘాటీ' అనుష్క కెరీర్ లో గుర్తుండిపోయే సినిమా అవుతుందని అంటున్నారు. ఆ మధ్య ముంబై వేదికగా నిర్వహించిన అమెజాన్ ప్రైమ్ వీడియో ఈవెంట్ లో ప్రీ లుక్ పోస్టర్ ను రిలీజ్ చేశారు. ఇందులో ఆమె ఫేస్ ను రివీల్ చెయ్యకుండా, చీరకొంగుతో ముసుగు కప్పుకొని ఉన్న బ్యాక్ సైడ్ లుక్ ను మాత్రమే చూపించారు. అందుకే ఈ నెల 7వ తారీఖున రాబోతున్న ఫస్ లుక్ కోసం ఫ్యాన్స్ అందరూ ఎగ్జైటింగ్ గా ఉన్నారు. అదే రోజున మిగిలిన నటీనటులు, సాంకేతిక నిపుణుల వివరాలను కూడా మేకర్స్ వెల్లడించనున్నారు.

యూవీ క్రియేషన్స్, ఫస్ట్‌ ఫ్రేమ్‌ ఎంటర్‌టైన్‌మెంట్‌ సంస్థలు సంయుక్తంగా భారీ బడ్జెట్ తో 'ఘాటీ' చిత్రాన్ని నిర్మిస్తున్నాయి. వంశీ కృష్ణా రెడ్డి, ప్రమోద్ ఉప్పలపాటి, వై రాజీవ్ రెడ్డి, జె. సాయి బాబు నిర్మాతలుగా వ్యవహరిస్తున్నారు. బుర్రా సాయిమాధవ్‌ డైలాగ్స్ రాసారు. ఇదిలా ఉంటే 'కథనార్ - ది వైల్డ్ సోర్సెరర్' అనే పీరియాడిక్ యాక్షన్ థ్రిల్లర్ తో మలయాళ చిత్ర పరిశ్రమలో ఎంట్రీ ఇవ్వబోతోంది అనుష్క. త్వరలోనే ఈ చిత్రానికి సంబంధించిన అప్డేట్ కూడా రానుంది.