గుస‌గుస‌.. న‌ట‌న వ‌దిలేస్తున్న అనుష్క‌?

రెండవ బిడ్డకు జ‌న్మ‌నిచ్చాక‌ అనుష్క నటనకు స్వస్తి చెబుతుందా? అంటే అవున‌నే గుస‌గుస‌లు వినిపిస్తున్నాయి. ఒక త్రోబ్యాక్ ఇంట‌ర్వ్యూలో పిల్లలు పుట్టిన తర్వాత నటనను విడిచిపెట్టడం గురించి మాట్లాడింది. ప్ర‌స్తుతం ఈ వీడియో వెబ్ లో వైర‌ల్ గా మారింది.

అనుష్క శర్మ - విరాట్ కోహ్లి తమ రెండవ బిడ్డను ఆశిస్తున్నట్లు వార్తలు వెలువడినప్పటి నుండి హెడ్ లైన్స్ లో నిలుస్తున్నారు. ఈ జంట అధికారిక ప్రకటన చేస్తార‌ని అభిమానులు వేచి చూస్తున్నారు. అనుష్క త‌న గ‌ర్భంలో రెండవ మాసం బిడ్డ‌ను మోస్తోంద‌ని, త్వరలో దంప‌తులు అధికారికంగా తెలియజేస్తారని సరైన సమయం కోసం ఎదురు చూస్తున్నారని క‌థ‌నాలొచ్చాయి. కొంద‌రు స్టిల్ ఫోటోగ్రాప‌ర్లు ఈ జంటను ప్రసూతి గృహం(క్లినిక్) వెలుపల గుర్తించిన తర్వాత ఈ వార్త దావానంలా మారింది. ఈ దంప‌తులు త‌మ ఫోటోల‌ను క్లిక్ చేయవద్దని వారిని అభ్యర్థించారు. త్వరలో అధికారిక ప్రకటన చేస్తామని ధృవీకరించారని క‌థ‌నాలొచ్చాయి.

ఇప్పుడు ఈ వార్త బయటకు రావడంతో అధికారిక‌ నిర్ధారణ కోసం మాత్రమే ఫ్యాన్స్ ఎదురుచూస్తున్నారు. వామిక వారి తొలి బిడ్డ‌. ఇప్పుడు రెండవ బిడ్డకు జ‌న్మ‌నివ్వ‌నున్నారు. అనుష్క‌కు రెండో బిడ్డ జ‌న‌నం త‌ర్వాత బాధ్య‌త‌లు మ‌రింతగా పెరుగుతాయి. ఒక త్రోబ్యాక్ ఇంట‌ర్వ్యూలో అనుష్క‌శ‌ర్మ మాట్లాడుతూ.. కుటుంబం పిల్లల కోసం తన వృత్తిని సంతోషంగా వదిలివేయడంపై మాట్లాడింది. ఈ పాత ఇంటర్వ్యూలో అనుష్క సిమి అగర్వాల్ రెండెజౌస్ అనే పాపుల‌ర్ చాట్ షోలో చాలా విష‌యాలు మాట్లాడుతూ కనిపించింది. స‌ద‌రు న‌టీమ‌ణి పెళ్లి, పిల్లలు తన జీవితంలో చాలా ముఖ్యమైన అంశాలు అని పేర్కొంది. అవ‌స‌రం అనుకుంటే నటనను కూడా విడిచిపెట్టడానికి సిద్ధ‌మ‌ని ఛూఛాయ‌గా అంగీక‌రించింది. వివాహం నాకు చాలా ముఖ్యమైనది.. పెళ్లి చేసుకుని పిల్లలను కలిగి ఉండాలనుకుంటున్నాను.. నేను వివాహం చేసుకున్నప్పుడు బహుశా ఉద్యోగం చేయకూడదనుకుంటున్నాను.. అని స్ప‌ష్ఠంగా వ్యాఖ్యానించింది.

కెరీర్ మ్యాట‌ర్‌కి వ‌స్తే.. అనుష్క తదుపరి `చక్దా ఎక్స్‌ప్రెస్` షూటింగ్‌ను ముగించింది. ఈ చిత్రం ప్రస్తుతం పోస్ట్ ప్రొడక్షన్ దశలో ఉంది. చక్దా ఎక్స్‌ప్రెస్ క‌థాంశం ఆస‌క్తిక‌రం. ప్రపంచ క్రికెట్ చరిత్రలో అత్యంత వేగవంతమైన మహిళా పేసర్‌లలో ఒకరైన ఝులన్ గోస్వామి జీవితం ఆధారంగా ఈ సినిమా తెర‌కెక్కుతోంది. పేసర్ గోస్వామి టీమిండియా కోసం ఆడ‌టం అనే తన ఏకైక కలను నెరవేర్చుకోవడానికి లెక్కలేనన్ని అడ్డంకులు క‌ష్టాల‌ను ఎదుర్కొంది. అయిన‌ప్ప‌టికీ విజయాల నిచ్చెనను ఎలా అధిరోహించాలో సాధించి చూపింది. ఇది ఎంతో స్ఫూర్తిదాయ‌క‌మైన క‌థాంశం. ప్రోసిత్ రాయ్ దర్శకత్వం వహించిన చక్దా ఎక్స్‌ప్రెస్ ఐదు సంవత్సరాల విశ్రాంతి తర్వాత అనుష్క శ‌ర్మ‌కు కంబ్యాక్ మూవీగా నిల‌వ‌నుంది. త‌ను న‌టించిన‌ చివరి చిత్రం జీరో (2018) డిజాస్ట‌రైన సంగ‌తి తెలిసిందే. చ‌క్ దా ఎక్స్ ప్రెస్ చిత్రం OTT ప్లాట్‌ఫారమ్‌లో విడుదల కానుంది. దీంతో అనుష్క‌ డిజిటల్ ప్రపంచంలోను అరంగేట్రం చేస్తోంది.