ఆ విషయంలో ఆదిపురుష్ అదరహో.. అనిపిస్తుందట!

రాధేశ్యామ్ తర్వాత పాన్ ఇండియా స్టార్ ప్రభాస్.. వరుసగా నాలుగు సినిమాలను లైన్ లో పెట్టేసాడు. అందులో ఒకటి ఆదిపురుష్. మైథాలజీ రామాయణం నేపథ్యంలో తెరకెక్కుతున్న ఈ 3డి మోషన్ కాప్చర్ మూవీ దేశవ్యాప్తంగా సినీ అభిమానులు ఎదురుచూస్తున్న సినిమాల్లో ఒకటి. 2022 ఆగష్టు 11న సినిమాను విడుదల చేయనున్నట్లు ఇదివరకే మేకర్స్ ప్రకటించారు. తానాజీ ఫేమ్ ఓం రౌత్ దర్శకత్వంలో రూపొందుతున్న ఈ సినిమా ప్రస్తుతం శరవేగంగా షూటింగ్ జరుపుకుంటుంది. ముంబై శివారులో వేసిన భారీ సెట్ లో ఆదిపురుష్ సినిమా చిత్రికరణ జరుపుకుంటుంది. ఈ సినిమా షూటింగ్ మొత్తాన్ని ఒకే స్టూడియోలో ఫినిష్ చేసే విధంగా ప్లాన్ చేశారు మేకర్స్.

పాన్ ఇండియా సినిమాగా తెరకెక్కుతున్న ఈ సినిమాలో శ్రీరాముడి పాత్రలో ప్రభాస్ నటిస్తుండగా.. సీతాదేవిగా కృతిసనన్ కనిపించనుంది. లక్ష్మణుడుగా సన్నీసింగ్ లతో పాటు విలన్ రావణాసురుడుగా స్టార్ బాలీవుడ్ యాక్టర్ సైఫ్ అలీఖాన్ కనిపించనున్నాడు. అయితే తాజాగా డైరెక్టర్ ఓం రౌత్ మీడియాతో మాట్లాడుతూ.. "ఆదిపురుష్ సినిమా షూటింగ్ ప్రస్తుతం ఆపేసాం. ఎందుకంటే కరోనా వ్యాప్తి కారణంగా షూటింగ్ బ్రేక్ వేయాల్సి వచ్చింది. అయితే ప్రస్తుతం ఆదిపురుష్ సిజిఐ, విఎఫ్ఎక్స్ వర్క్ జరుగుతుంది. ఈ సినిమా 3డి మోషన్ కాప్చర్ లో సాంకేతికంగా విజువల్ వండర్ లా ఉండబోతుంది. బాలీవుడ్ టి-సిరీస్ వారు ఈ సినిమాను భారీ బడ్జెట్ తో నిర్మిస్తోంది. హైక్లాస్ రేంజిలో సినిమాను తీర్చిదిద్దుతున్నాం" అని తెలిపాడు.