అల్లు వారబ్బాయి.. అవార్డుల పండుగ..

మన తెలుగు సినిమా స్టార్లు అయితే సినిమాలు చేస్తుంటారు.. లేకపోతే యాడ్స్ చేసుకుంటూ ఉంటారు.. ఫంక్షన్ లలో కనిపించి నాలుగు ముక్కలు మాట్లాడుతుంటారు. చాలా వరకు తమ సొంత ఈవెంట్ లలో కూడా చెయ్యి - కాలు కదిపే అలవాటు మనోళ్లకి లేదు. ఇక యాంకరింగూ గట్రా అంటే.. మన హీరో హీరోయిన్లు దూరం దూరం అంటుంటారు.

ఇలాంటి మంచి మంచి అలవాట్లున్న మనోళ్లని ఏదైనా అవార్డ్ ఫంక్షన్ నిర్వహించమంటే.. వాళ్ల చేతులో మీదుగా ఓ భారీ కార్యక్రమ నిర్వహణ అంటే సాధ్యమేనా అనిపించడం సహజం. కానీ అల్లు వారబ్బాయి మాత్రం దీనికి సై అంటున్నాడు. ఓ ఆరు నెలల క్రితం బాహుబలి ఆడియో వేడుకను హీరో నాని చేతుల మీదుగా జరుగుతుందని చెప్పారు కానీ.. అది సాధ్యపడలేదు. ఇప్పుడు ఐఐఎఫ్ ఏ కి సంబంధించిన తెలుగు సెగ్మెంట్ ని అల్లు శిరీష్ హోస్ట్ చేయబోతున్నాడు. ఈ ఈ వెంట్ ను ఫుల్లు - ఎంటర్ టెయిన్ మెంట్ తో తీర్చిదిద్దేస్తానని ధీమాగా చెప్పేశాడు అల్లు శిరీష్. ఇప్పటికైతే ఇంకా హీరోగా క్లిక్ కావడానికి ఇబ్బందులు పడుతున్న శిరీష్ కి - ఈవెంట్ ఆర్గనైజేషన్ లో మంచి అనుభవమే ఉంది.

గతంలో మెగా హీరోల ఫంక్షన్ల నిర్వహణ దగ్గరుండి చూసుకున్నాడు. ఇప్పుడు ఏకంగా హోస్ట్ అవతారమెత్తుతున్నాడు. చేసిన సినిమాల వరకూ చూసిన మాటల విషయంలో కాస్త వెనకబడ్డ శిరీష్ - ఈవెంట్ ఎలా చేస్తాడో అనే అనుమానాలు ఉన్నా.. అసలు ఇలా చేయడానికి ముందుకు రావడం మాత్రం ప్రశంసించదగ్గ విషయమే. మొత్తానికి టాలీవుడ్ లో ఈ మెగా హీరో కొత్త కల్చర్ కి తెర తీస్తున్నట్లే.