అల్లు శిరీష్ సినిమాలో అనుకోని అతిథి

‘శ్రీరస్తు శుభమస్తు’ సినిమాతో ఎట్టకేలకు హిట్టు కొట్టేశాడు అల్లు శిరీష్. ఈ ఊపులో ఇంట్రెస్టింగ్ ప్రాజెక్టులు లైన్లో పెడుతున్నాడు. మలయాళంలో మోహన్ లాల్ లాంటి సూపర్ స్టార్‌తో కలిసి ‘1971’ అనే వార్ బేస్డ్ మూవీలో శిరీష్ నటిస్తున్న సంగతి తెలిసిందే. నిర్విరామంగా ఈ సినిమా షూటింగ్‌లో పాల్గొంటున్నాడు శిరీష్. దీని తర్వాత తెలుగులో హీరోగా ఓ క్రేజీ ప్రాజెక్టు చేయబోతున్నాడు. ‘ఎక్కడికి పోతావు చిన్నవాడా’ సినిమాతో ఇండస్ట్రీ దృష్టిని ఆకర్షించిన వీఐ ఆనంద్ దర్శకత్వంలో శిరీష్ ఓ సైంటిఫిక్ థ్రిల్లర్ చేయబోతున్న సంగతి తెలిసిందే. ఈ చిత్రంలో ఓ ముఖ్య పాత్రను అవసరాల శ్రీనివాస్ చేయబోతుండటం విశేషం.

చిన్న పాత్ర చేసినా తన ప్రత్యేకతను చాటుకునే అవసరాల శ్రీనివాస్.. శిరీష్-వీఐ ఆనంద్ సినిమాలో ఓ కీలక పాత్రే చేస్తున్నాడట. అతడి పాత్రే కథలో కీలక మలుపుకు కారణమవుతుందట. దర్శకుడిగా మారాక ఆచితూచి సినిమాలు ఎంచుకుంటున్నాడు అవసరాల. మామూలు పాత్రలు ఒప్పుకోవట్లేదు. మరి వీఐ ఆనంద్ సినిమాలో అతడి పాత్ర ఎంత ప్రత్యేకంగా ఉందో చూడాలి. ‘జ్యో అచ్యుతానంద’ తర్వాత దర్శకత్వానికి విరామం ఇచ్చి తనే కథానాయకుడిగా ‘బాబు బాగా బిజీ’ సినిమా చేశాడు అవసరాల. హిందీ హిట్ ‘హంటర్’కు రీమేక్‌గా వస్తున్న ఈ సినిమా జనాల్లో భలే ఆసక్తి రేకెత్తిస్తోంది. ఈ అడల్ట్ కామెడీ మూవీ మార్చిలో ప్రేక్షకుల ముందుకొస్తుంది.

Like Us on Facebook : https://www.facebook.com/Tupakidotcom/