#RRR లో యాక్షన్‌ తో పాటు సెంటిమెంట్‌ కూడా..!

రాజమౌళి దర్శకత్వంలో తెరకెక్కుతున్న ‘ఆర్‌ఆర్‌ఆర్‌’ చిత్రం షూటింగ్‌ కరోనా కారణంగా నిలిచి పోయింది. సినిమాను 2021 సంక్రాంతికి ఖచ్చితంగా తీసుకు రావాలనుకున్న జక్కన్న కరోనా కారణంగా సినిమాను మళ్లీ వాయిదా వేయక తప్పడం లేదు. వచ్చే ఏడాది ద్వితీయార్థం వరకు సినిమాను పూర్తి చేసి విడుదల చేసే అవకాశం ఉందని తెలుస్తోంది. బాహుబలి తర్వాత జక్కన్న తీస్తున్న సినిమా అవ్వడంతో అంచనాలు ఆకాశాన్ని తాకేలా ఉన్నాయి. సౌత్‌ లోనే కాకుండా బాలీవుడ్‌ లో కూడా అంచనాలు ఉన్న కారణంగా రోజుకో వార్త వస్తూనే ఉంది.

ప్రస్తుతం ఈ చిత్రంలో ఉండే సెంటిమెంట్‌ సీన్స్‌ గురించి చర్చ జరుగుతోంది. రెండు విభిన్న ప్రాంతాలకు చెందిన అల్లూరి రామరాజు మరియు కొమురం భీమ్‌ లు ఒక్క చోట కలుస్తారు. వారిద్దరు అన్నదమ్ములుగా మారిపోతారు. వారిద్దరి మద్య కొన్ని బ్రదర్స్‌ సెంటిమెంట్‌ సీన్స్‌ కూడా ఉంటాయని ఆ ఎమోషన్‌ సీన్స్‌ సినిమాకు ప్రత్యేక ఆకర్షణగా ఉంటాయని యూనిట్‌ సభ్యులు అంటున్నారు. యాక్షన్‌ సీన్స్‌ తో పాటు ఆ సెంటిమెంట్‌ సీన్స్‌ మరియు హీరోయిన్స్‌ తో రొమాంటిక్‌ సీన్స్‌ ఇలా అన్ని కూడా సమపాళ్లలో ఈ చిత్రంలో ఉంటాయని టాక్‌ వినిపిస్తుంది.

డివివి దానయ్య భారీ బడ్జెట్‌ తో నిర్మిస్తున్న ఈ చిత్రంలో బాలీవుడ్‌ స్టార్స్‌ అజయ్‌ దేవగన్‌ మరియు ఆలియా భట్‌ లు నటిస్తున్నారు. తమిళ విలక్షణ నటుడు సముద్ర ఖని కూడా ఈ చిత్రంలో నటిస్తున్నాడు. ఇప్పటికే సినిమా స్టోరీ లైన్‌ ను రఫ్‌ గా చెప్పేసిన జక్కన్న సినిమాపై అంచనాలు పెంచేలా ఎన్టీఆర్‌ వాయిస్‌ ఓవర్‌ తో రామ్‌ చరణ్‌ పాత్ర రామరాజు వీడియోను విడుదల చేశారు. ఇప్పుడు ఎన్టీఆర్‌ వీడియో కోసం ఫ్యాన్స్‌ ఎదురు చూస్తున్నారు.