మహేషూ.. ఏం టైమింగయ్యా బాబూ

అటు చూస్తే శ్రీనివాసుడి బ్రహ్మోత్సవాలు మొదలయ్యాయి. ఇటు చూస్తే మహేష్ బాబు ‘బ్రహ్మోత్సవం’ మొదలుపెట్టేశాడు. వాట్ ఎ టైమింగ్.. వాట్ ఎ టైమింగ్.. అంటూ అభిమానులు రచ్చ రచ్చ చేసేస్తున్నారు. ఉదయం ఇలా ‘బ్రహ్మోత్సవం’ ఆరంభమవడం ఆలస్యంగా సోషల్ మీడియాలో సంబరాలే సంబరాలు. ‘బ్రహ్మోత్సవం బిగిన్స్’ అంటూ ట్విట్టర్ హ్యాష్ ట్యాగ్ పెట్టి.. సూపర్ స్టార్ అభిమానులు మోత పుట్టించేశారు. కాసేపటికే ఇండియా లెవెల్లో నెంవర్ వన్ స్థానంలో ట్రెండ్ అయింది ఈ హ్యాష్ ట్యాగ్. ఫ్యాన్ మేడ్ బ్రహ్మోత్సవం పోస్టర్ లతో.. శ్రీమంతుడు బ్రహ్మోత్సవం చేయబోతున్నాడన్నట్వీట్ లతో అభిమానులు ఉత్సాహం ప్రదర్శించారు.

సీతమ్మ వాకిట్లో సిరిమల్లె చెట్టు తర్వాత మహేష్ - శ్రీకాంత్ అడ్డాల కాంబినేషన్ లో తెరకెక్కబోతున్న సినిమా కావడంతో ‘బ్రహ్మోత్సవం’ సినిమాపై అంచనాలు భారీగానే ఉన్నాయి. టైటిల్ తోనే సగం మార్కులు కొట్టేశాడు అడ్డాల. వర్ణ - బలుపు - సైజ్ జీరో లాంటి సినిమాల తర్వాత పొట్లూరి వర ప్రసాద్ నిర్మిస్తున్న సినిమా ఇది. మహేష్ కెరీర్ లో తొలిసారి ముగ్గురు హీరోయిన్లతో నటిస్తుండటం విశేషం. సమంత - కాజల్ - ప్రణీత.. ఆ ముగ్గురు హీరోయిన్లు. మహేష్ సమంతతో దూకుడు - సీతమ్మవాకిట్లో సిరిమల్లె చెట్టు.. కాజల్ తో బిజినెస్ మేన్ లాంటి హిట్లు కొట్టడం కూడా అభిమానుల్లో అంచనాలు పెంచుతోంది. తన ప్రతి సినిమాతోనూ ఎంతో కొంత మంచి చెప్పాలని తపించే శ్రీకాంత్.. మరోసారి మహేష్ లాంటి సూపర్ స్టార్ తో మంచి ఫ్యామిలీ ఎంటర్టైనర్ తీయాలని చూస్తున్నాడు. వచ్చే ఏడాది మార్చి నెలాఖరులో ఈ సినిమా ప్రేక్షకుల ముందుకొస్తుంది.