ముద్దులు వసూళ్లు తెస్తాయా!

షూటింగ్ స్టేజిలో పెద్దగా సందడి లేకుండా నడిచిన 24 కిసెస్ ఎల్లుండి విడుదల కానుండగా ఓ న్యూస్ ఛానల్ పుణ్యమా అని బాగానే హైప్ తెచ్చేసుకుంది. ఇప్పటికే ట్రైలర్ తో పాటు పోస్టర్ల రూపంలో ఇందులో కంటెంట్ ని చూచాయగా చెప్పడంతో యూత్ దీని మీద ఆసక్తిగా ఉన్నారు. కుమారి 21ఎఫ్ తో ప్రత్యేక గుర్తింపు తెచ్చుకున్న హేబ్బా పటేల్ కాస్త బోల్డ్ గా కిస్సింగ్ సీన్స్ లో నటించడంతో అంచనాలు మెల్లగా ఎగబాకుతున్నాయి. ఇలాంటి సినిమాలు తీయడం వల్ల సమాజం మీద ప్రభావం గురించి ఇటీవలే ఓ న్యూస్ ఛానల్ పెద్ద డిబేట్ నిర్వహించింది.

యాంకర్ ముద్దుల గురించి అడిగిన చిత్ర విచిత్రమైన ప్రశ్నలు తట్టుకోలేక హెబ్బ పటేల్ మధ్యలోనే వాకవుట్ చేసి వెళ్ళిపోవడం వీడియో రూపంలో బాగా వైరల్ అయ్యింది. అదే షోలో పాల్గొన్న ఆరెక్స్ 100 దర్శకుడు అజయ్ భూపతితో పాటు 24 కిసేస్ డైరెక్టర్ అయోధ్య కుమార్ హీరో అదిత్ అరుణ్ లతో అక్కడికి వచ్చిన వాళ్ళు కాస్త తీవ్ర స్థాయిలోనే వాదులాడుకున్నారు. మిణుగురులు లాంటి కాన్సెప్ట్ బేస్డ్ మూవీ రూపొందించిన అయోధ్య కుమార్ ఇలాంటి సినిమా తీయడం ఏమిటనే విమర్శకు సమాధానం స్పష్టంగానే చెబుతున్నాడు సదరు దర్శకుడు.

ముద్దులు వసూళ్లు తీసుకురావని కంటెంట్ ఉంటేనే ప్రేక్షకులు ఆదరిస్తారు అని గతంలో చాలా సార్లు రుజువైన సంగతి మర్చిపోకూడదని అంటున్నారు. పైగా ఆరెక్స్ 100-అర్జున్ రెడ్డి ప్రభావంతో ఇది తీసారనే ప్రచారాన్ని కూడా కొట్టి పారేసారు. అవి రిలీజ్ కాక ముందే ఈ 24 కిసెస్ షూటింగ్ లో ఉందని కాకపోతే ఇతరత్రా కారణాల వల్ల విడుదల ఆలస్యం అయ్యిందే తప్ప తనది ఒరిజినల్ ఐడియా అని నొక్కి చెబుతున్నారు. మొత్తానికి సరైన సమయంలో సరిపోయే బజ్ తెచ్చుకున్న 24 కిసెస్ సంగతేంటో ఇంకో 48 గంటల్లో తెలిసిపోతుంది