ఆ ఇద్దరు హాస్యనటులకే దర్శకనిర్మాతల ఓటు..!

తెలుగు సినిమాలలో హాస్యానికి ఎంతటి ప్రాధాన్యత ఉంటుందో ప్రత్యేకంగా చెప్పక్కర్లేదు. తమ హావాభావలలో ఇతరులను నవ్వించండం అనేది ఒక గొప్ప కళ అని చెప్పవచ్చు. అలాంటి కళను సునాయాసనంగా పండిస్తూ టాలీవుడ్ లో చాలామంది కమెడియన్స్ మంచి పేరు తెచ్చుకున్నారు. అప్పట్లో రేలంగి - రాజబాబు - అల్లు రామలింగయ్య వంటి హాస్యనటులు ప్రేక్షకులను అలరించారు. ఆ తర్వాత బ్రహ్మానందం - బాబుమోహన్ - ఎమ్మెస్ నారాయణ దగ్గర నుంచి సునీల్ - వేణు మాధవ్ - కృష్ణ భగవాన్ వంటి కమెడియన్స్ హవా కొనసాగింది. ఇప్పుడు జబర్దస్త్ కమెడియన్స్ తో కలుపుకుని తెలుగులో కావల్సినంత మంది హాస్య నటులు అందుబాటులో ఉన్నారు. అయితే వారిలో ఒకరిద్దరు మాత్రం ఒక ఏడాది పాటు డేట్స్ కేటాయించలేనంత బిజీగా ఉన్నారు. వారే వెన్నెల కిషోర్ - సత్య.

ప్రస్తుతం టాలీవుడ్ లో ఎంతమంది కమెడియన్స్ ఉన్నా వెన్నెల కిషోర్ - సత్య ఇద్దరూ టాప్ క‌మీడియ‌న్లుగా చెలామ‌ణి అవుతున్నారు. వీరిద్దరూ తమదైన మార్క్ కామెడీతో అలరిస్తూ మోస్ట్ వాంటెడ్ కమెడియన్స్ గా బిజీగా గడుపుతున్నారు. వీళ్ళు లేని సినిమాలను వేళ్ళ మీద లెక్కపెట్టొచ్చు అంటేనే వీరిద్దరూ ఎంత బిజీగా ఉన్నారో అర్థం చేసుకోవచ్చు. వెన్నెల కిశోర్ - సత్య డేట్స్ దాదాపు ఏడాదిన్న‌ర పాటు ఖాళీ లేవని తెలుస్తోంది. టాలీవుడ్ ద‌ర్శ‌కనిర్మాత‌లు వెన్నెల కిషోర్ త‌రువాత స‌త్యకే ఓటు వేస్తున్నారు. ఇప్పుడు సత్య హీరోగా కూడా ఇంట్రడ్యూస్ అవుతున్నాడు. హీరో సందీప్ కిషన్ తన హోమ్ బ్యానర్ లో సత్యను హీరోగా పెట్టి 'వివాహ భోజనంబు' అనే సినిమా చేస్తున్నాడు.