ఇస్మార్ట్ గా రౌండ‌ప్ చేశారు!

``ఇలా రౌండప్ చేసి కన్ఫ్యూజ్ చేయకు. కన్ఫ్యూజన్ లో ఎక్కువ కొట్టేస్తా!`` .. `బిజినెస్ మేన్` చిత్రంలోని పంచ్ డైలాగ్ ఇది. మ‌హేష్ హీరోగా న‌టించిన ఆ సినిమా తీసింది పూరి జ‌గ‌న్నాథ్. ఆయ‌నే ఇప్పుడు రామ్ హీరోగా `ఇస్మార్ట్ శంక‌ర్` ని తీస్తున్నారు. ఈ సినిమాని ఇస్మార్ట్ గా రౌండ‌ప్ చేశార‌నే తాజా స‌న్నివేశం చెబుతోంది. సోలో రిలీజ్ తో హిట్టు కొట్టాల‌న్న పూరి ఆశ‌ల‌పై నీళ్లు చ‌ల్లుతూ వ‌చ్చే వారం ఏకంగా నాలుగైదు సినిమాలు పోటీ బ‌రిలో దిగుతున్నాయి.

జూలై 18న `ఇస్మార్ట్ శంక‌ర్` చిత్రాన్ని రిలీజ్ చేస్తున్నామ‌ని పూరి లాంటి స్టార్ డైరెక్ట‌ర్ ప్ర‌క‌టించినా ఎవ‌రూ ప‌ట్టించుకోవ‌డం లేదు. చియాన్ విక్ర‌మ్ న‌టించిన క్రైమ్ డిటెక్టివ్ థ్రిల్ల‌ర్ `మిస్ట‌ర్ కెకె` జూలై 19న‌ వ‌స్తోంది. చాలా కాలంగా రిలీజ్ కి నోచుకోక పెండింగులో ఉన్న సంపూర్ణేష్ బాబు `కొబ్బ‌రి మ‌ట్ట‌` కూడా ఏమాత్రం జంకు అన్న‌దే లేకుండా రిలీజైపోతోంది. `నేను లేను` (హ‌ర్షిత్) అనే ఓ చిన్న సినిమా రిలీజ‌వుతోంది. వీటితో పాటు అమ‌లాపాల్ న‌టించిన డ‌బ్బింగ్ సినిమా `ఆమె` కూడా అదే రోజు రిలీజ‌వుతోంది. స‌డెన్ గా వేరే సినిమాల రిలీజ్ తేదీల్ని ప్ర‌క‌టించే వీలుంద‌న్న ముచ్చ‌టా సాగుతోంది. ఈ పోటీ చూస్తుంటే శంక‌ర్ ని ఇస్మార్ట్ గానే రౌండ‌ప్ చేసి క‌న్ఫ్యూజ్ చేస్తున్నార‌ని అర్థ‌మ‌వుతోంది. క్రైమ్ థ్రిల్ల‌ర్ జోన‌ర్ లో తెర‌కెక్కిన మిస్ట‌ర్ కెకె  .. అమ‌లాపాల్ న‌గ్నంగా (బోల్డ్) గా న‌టించిన ఆమె (ఆడై) చిత్రాలు డ‌బ్బింగులే అయినా ఇవి స్ట్రెయిట్ సినిమా `ఇస్మార్ట్ శంక‌ర్`కి గ‌ట్టి పోటీనే ఇవ్వ‌నున్నాయ‌ని అర్థ‌మ‌వుతోంది.

ఇస్మార్ట్ శంక‌ర్ రిలీజైన త‌ర్వాతి వారంలో (జూలై 26)  దేవ‌ర‌కొండ `డియ‌ర్ కామ్రేడ్` రిలీజ్ బ‌రిలోకి వ‌స్తుండ‌డంతో ఆ సినిమా ప్ర‌భావం ఇస్మార్ట్ క‌లెక్ష‌న్ల‌పై చూప‌డం ఖాయంగా క‌నిపిస్తోంది. మ‌రి ఈ సినిమాల‌న్నిటికీ ఎన‌ర్జిటిక్ రామ్ - పూరి జగ‌న్నాథ్ కాంబో మూవీ `ఇస్మార్ట్ శంక‌ర్` ఎలాంటి పోటీని ఇవ్వ‌బోతోంది? అన్న‌ది చూడాలి. కొన్ని వ‌రుస ప‌రాజ‌యాల త‌ర్వాత పూరి- రామ్ జోడీ బౌన్స్ బ్యాక్ అయ్యేందుకు చాలానే హార్డ్ వ‌ర్క్ చేస్తున్న సంగ‌తి తెలిసిందే.