షారుఖ్ సినిమా.. దానికి సీక్వెలా?

ఒకప్పుడు బాలీవుడ్లో తిరుగులేని ఆధిపత్యం చలాయించి ‘బాలీవుడ్ బాద్ షా’ అని.. ‘కింగ్ ఖాన్’ అని బిరుదులు తెచ్చుకున్న షారుఖ్ ఖాన్.. గత కొన్నేళ్లలో బాగా వెనుకబడిపోయాడు. అమీర్ ఖాన్.. సల్మాన్ ఖాన్ అతణ్ని దాటేసి ముందుకు దూసుకెళ్లిపోగా.. షారుఖ్ రేంజ్ అంతకంతకూ పడిపోతోంది. ఈ ఏడాది ఆరంభంలో విడుదలైన ‘రయీస్’ది ఆరంభ శూరత్వమే అయింది.

ఇప్పుడు షారుఖ్ ఆశలన్నీ ఇంతియాజ్ అలీ దర్శకత్వంలో చేస్తున్న సినిమా మీదే ఉన్నాయి. ఈ సినిమా టైటిల్ తో పాటుగా ఫస్ట్ లుక్ పోస్టర్ రిలీజ్ చేశారు. షారుఖ్ సొంత బేనర్లో తెరకెక్కుతున్న ఈ చిత్రానికి ‘జబ్ హ్యారీ మెట్ సెజాల్’ అనే పేరు పెట్టారు. ఈ పేరుతో పాటుగా సినిమా పోస్టర్లు కూడా భలే కలర్ ఫుల్ గా ఉండి జనాల దృష్టిని బాగా ఆకర్షిస్తున్నాయి.

సినిమా చాలా కొత్తగా.. ఫీల్ గుడ్ అనిపించేలా  ఉంటుందన్న అంచనాలు కలుగుతున్నాయి ఫస్ట్ లుక్ పోస్టర్లు చూస్తే. ఇంతియాజ్ అలీ క్లాస్.. అతడి టేస్ట్ పోస్టర్లలో కనిపిస్తున్నాయి. ‘జబ్ హ్యారీ మెట్ సెజాల్’ అనే పేరు వినగానే ఇంతియాజ్ అలీ కెరీర్లో బిగ్గెస్ట్ హిట్ గా నిలిచిన ‘జబ్ వుయ్ మెట్’ గుర్తుకు రావడం సహజం. ఈ టైటిల్ ను బట్టి చూస్తుంటే అదే లైన్స్ లో కొత్త సినిమాను తెరకెక్కించినట్లున్నాడు ఇంతియాజ్. ఇది దానికి సీక్వెల్ అయ్యుండొచ్చని కూడా అంటున్నారు.

‘జబ్ వుయ్ మెట్’లో షాహిద్ కపూర్-కరీనా కపూర్ జంటగా నటించారు. వాళ్లు ప్రేమికులుగా ఉన్నపుడు చేసిన ఆ సినిమాలో అదిరిపోయే కెమిస్ట్రీ పండింది. సినిమా సూపర్ హిట్ అయింది. ‘జబ్ హ్యారీ మెట్ సెజాల్’లో షారుఖ్ సరసన అనుష్క శర్మ నటిస్తోంది. ఐతే ఇంతియాజ్ సినిమాలు మరీ క్లాస్ గా ఉండి ఓ వర్గం ప్రేక్షకులకే నచ్చుతాయన్న విమర్శ ఉంది. అతడి సినిమాలు బాగున్నా కమర్షియల్ సక్సెస్ కావడం అరుదు. మరి ‘జబ్ హ్యారీ మెట్ సెజాల్’ ఎలాంటి ఫలితాన్నిస్తుందో చూడాలి.

Like Us on Facebook : https://www.facebook.com/Tupakidotcom/