కళ్యాణ్ రామ్ టార్గెట్ మారింది

‘ఇజం’ తర్వాత కళ్యాణ్ రామ్ తో సినిమా చేస్తారంటూ చాలామంది దర్శకుల పేర్లు వినిపించాయి. ముందు ‘పటాస్’ తర్వాత కళ్యాణ్ రామ్ కోసం అనిల్ రావిపూడి మరో మంచి స్క్రిప్టు రెడీ చేశాడన్నారు. దానికి కళ్యాణ్ రామ్ కూడా ఓకే అన్నట్లు వార్తలొచ్చాయి.  ఇంకోవైపు ఎ.ఎస్.రవికుమార్ చౌదరి కళ్యాణ్ రామ్-సాయిధరమ్ తేజ్ కాంబినేషన్లో మల్టీస్టారర్ కోసం కథ రెడీ చేస్తున్నట్లు చెప్పారు. మరోవైపు ‘శ్రీరస్తు శుభమస్తు’తో విజయాన్నందుకున్న పరశురామ్ కళ్యాణ్ రామ్ కోసం ప్రయత్నిస్తున్నట్లు వార్తలొచ్చాయి. వీళ్లందరూ కాక ‘ప్రస్థానం’ ఫేమ్ దేవా కట్టా చాలా గ్యాప్ తర్వాత మళ్లీ కళ్యాణ్ రామ్ సినిమాతో రీఎంట్రీ ఇవ్వాలనుకుంటున్నట్లు చెప్పుకున్నారు.

ఐతే వీళ్లెవ్వరితోనూ కళ్యాణ్ రామ్ సినిమా ఓకే అవ్వలేదు. ఇప్పుడు కళ్యాణ్ రామ్ లిస్టులోకి కొత్త పేరొచ్చింది. కామెడీ చిత్రాల స్పెషలిస్టు జి.నాగేశ్వరరెడ్డి దర్శకత్వంలో నందమూరి హీరో సినిమా చేయబోతున్నాడట. షేర్.. ఇజం లాంటి సీరియస్ సినిమాలు దెబ్బ కొట్టిన నేపథ్యంలో ‘పటాస్’ లాంటి ఎంటర్టైనరే బెటర్ అని ఫీలైన కళ్యాణ్ రామ్.. నాగేశ్వరరెడ్డితో సినిమా చేయాలనుకుంటున్నాడట. ఫ్లాపుల్లో ఉన్న హీరోలకు హిట్లిస్తాడని పేరున్న నాగేశ్వరరెడ్డి.. లేటెస్టుగా అల్లరి నరేష్ తో  ‘ఇంట్లో దెయ్యం నాకేం భయం’ తీశాడు. ఈ సినిమా రిజల్టేంటో చూశాక కళ్యాణ్ రామ్ నిర్ణయం తీసుకుంటాడట. ఆ సినిమాకు పాజిటివ్ రిజల్ట్ వస్తే.. కళ్యాణ్ రామ్-నాగేశ్వరరెడ్డి కాంబినేషన్ ఓకే అయిపోయినట్లే.

Like Us on Facebook : https://www.facebook.com/Tupakidotcom/