మలయాళ రీమేక్ బాధ్యత డాలీ కి అప్పగిస్తున్నారా...?

మలయాళంలో అద్భుత విజయం సాధించిన ''అయ్యప్పనుమ్ కోషియమ్'' సినిమాను తెలుగులోకి రీమేక్ చేయడానికి ప్రయత్నాలు చేస్తున్న సంగతి తెలిసిందే. దీనికి సంబంధించిన రీమేక్ హక్కులను సితార ఎంటర్‌టైన్‌మెంట్స్ నిర్మాణ సంస్థ కొనుగోలు చేసింది. అప్పటి నుంచి ఈ క్రేజీ ప్రాజెక్ట్‌ లో నటించే హీరోలంటూ పలువరి కాంబినేషన్‌ పేర్లు తెరపైకి వచ్చాయి. అక్కడ బిజూ మీనన్ - పృథ్వీరాజ్ లు పోషించిన పాత్రల్లో బాలయ్య-రానా నటిస్తారని.. వెంకటేష్‌-రానా అని.. పవన్ కళ్యాణ్-రవితేజ అని.. ఇలా పలు కాంబోలు వినిపించాయి. కానీ ఏ కాంబో కూడా సెట్ అయినట్లు అధికారిక ప్రకటన రాలేదు. దీంతో సితారా వాళ్ళు కొన్నాళ్ళు ఈ ప్రాజెక్ట్ ని హోల్డ్ లో పెట్టాలని అనుకుంటున్నట్లు వార్తలు వచ్చాయి. అయితే ఇప్పుడు తాజా సమాచారం ప్రకారం ఈ రీమేక్ ని త్వరలోనే సెట్స్ పైకి తీసుకెళ్లడానికి సన్నాహకాలు జరుగుతున్నాయి.

కాగా, 'తడాఖా' 'గోపాలా గోపాల' 'కాటమరాయుడు' చిత్రాల దర్శకుడు డాలీ (కిషోర్ కుమార్ పార్థసాని) చేతిలో 'అయ్యప్పనుమ్ కోషియమ్' తెలుగు రీమేక్ బాధ్యత పెట్టనున్నారట. డాలీ ని డైరెక్టర్ గా ఎంపిక చేసుకోవడంతో.. దీంట్లో ప‌వన్ క‌ళ్యాణ్ నుంచి రిక‌మండేష‌న్ వెళ్లి ఉంటుందని.. ఈ ప్రాజెక్ట్ లోకి ప‌వ‌న్ కూడా ఎంట్రీ ఇస్తాడ‌నే టాక్ ఫిలిం సర్కిల్స్ లో వినిపిస్తోంది. అన్నీ కుదిరితే 'వకీల్‌ సాబ్‌' ని పూర్తి చేసిన వెంటనే పవన్‌ ఇందులోనే నటించబోతున్నట్లు వార్తలు వస్తున్నాయి. ఇప్పటికే ఈ సినిమాలో ఒక హీరోగా దగ్గుబాటి రానా ని ఫైనలైజ్ చేసినట్లు తెలుస్తోంది. మరి పవన్ కళ్యాణ్ ఇప్పటికే అడ్వాన్ ఇచ్చిన ప్రొడ్యూసర్స్ సినిమాలు చేస్తాడా లేదా మలయాళ రీమేక్ కి డేట్స్ ఇస్తాడా అనేది చూడాలి. మరి ఇందులో నిజమెంతో తెలియాలంటే అధికారిక ప్రకటన వచ్చే వరకు ఆగాల్సిందే.