‘కాటమరాయుడు’ను అభినందించిన కేటీఆర్

‘కాటమరాయుడు’ సినిమాకు ఒక ఆశ్చర్యకరమైన మద్దతు లభించింది. తెలంగాణ మంత్రి కల్వకుంట్ల రామారావు ఈ సినిమాను అభినందించారు. ఆయన ‘కాటమరాయుడు’ సినిమా చూసి పవన్ కళ్యాణ్ అండ్ టీంకు అభినందనలు తెలపడం విశేషం. ‘‘కాటమరాయుడు సినిమా చూశాను. కళ్యాణ్.. శరత్ మరార్ మీరు నిజమైన విజేతలు. చేనేత ఉత్పత్తులకు మంచి ప్రచారం కల్పించినందుకు అభినందిస్తున్నా’’ అని కేటీఆర్ ట్విట్టర్లో మెసేజ్ పెట్టారు. పవన్ కళ్యాణ్ తో ఉన్న ఫొటోను కూడా కేటీఆర్ షేర్ చేయడం విశేషం. అది తాజా ఫొటో లాగే ఉంది. పవన్ కాటమరాయుడు లుక్ లోనే ఉన్నాడు. బహుశా కేటీఆర్ కోసం పవనే స్పెషల్ షో వేయించాడేమో.

కొంత కాలంగా కేటీఆర్ చేనేత కార్మికులకు మంచి తోడ్పాటు అందిస్తున్నాడు. వారి ఉత్పత్తులకు మంచి ప్రచారం కల్పించేందుకు.. మార్కెట్ చేసేందుకు తన వంతు ప్రయత్నం చేస్తున్నాడు. సమంతను ఇందుకోసం బ్రాండ్ అంబాసిడర్ గా కూడా నియమించారు. సందర్భం వచ్చినపుడల్లా ట్విట్టర్లో చేనేత ఉత్పత్తులకు ప్రచారం కల్పిస్తున్నారు. మరోవైపు పవన్ సైతం చేనేత కార్మికుల్ని ఆదుకునేందుకు స్వచ్ఛందంగా ముందుకొచ్చిన సంగతి తెలిసిందే. వాళ్ల కోసం ఆయన ప్రత్యేక సభ కూడా ఏర్పాటు చేశారు. ‘కాటమరాయుడు’ సినిమా అంతటా పవన్ చేనేత వస్త్రాలనే ధరించాడు. వాటికి మంచి ప్రచారం కల్పించాడు. ఈ నేపథ్యంలోనే కేటీఆర్ ‘కాటమరాయుడు’ సినిమా చూసి పవన్ ను అభినందించారు.

Like Us on Facebook : https://www.facebook.com/Tupakidotcom/