ట్రైల‌ర్‌ టాక్: ల‌క్ష్మి డ్యాన్సింగ్‌ మెరుపులే..

ఇటీవ‌లి కాలంలో సౌతిండియాని హాలీవుడ్ స్ఫూర్తి ఊపేస్తోంది. అక్క‌డి నుంచి తెచ్చే ప్ర‌తి ఫార్ములా ఇక్క‌డా వ‌ర్క‌వుట‌వుతుండడంతో తెలివిగా లోకలైజ్ చేస్తూ బాగానే స‌క్సెస్ అందుకుంటున్నారు. స్ఫూర్తి ఏదైనా నేటివిటీని ప్ర‌తిబింబిస్తూ సినిమాని తీయ‌డంలో స‌క్సెసైతే ప్రేక్ష‌క జ‌నం బ్ర‌హ్మ‌ర‌థం ప‌డుతున్నారు. ముఖ్యంగా డ్యాన్స్ బేస్డ్ సినిమాల‌కు ఇండియాలో విశేష ఆద‌ర‌ణ ఉంది. హాలీవుడ్ స్టెప‌ప్ సిరీస్ ప్రేర‌ణ‌తో తెర‌కెక్కించిన అన్ని సినిమాలు భార‌త‌దేశంలో స‌క్సెస్ అందుకుంటున్నాయి. బుల్లితెర కార్య‌క్ర‌మాల్లోనూ స్టెప‌ప్ ప్రేర‌ణతో వేసే స్టెప్పుల‌కు క్లాప్స్ ప‌డటం చూస్తున్నాం. అథ్లెటిక్ మూవ్‌ మెంట్‌ తో ఒళ్లంతా విరుచుని వేసే డ్యాన్సుల‌కు యూత్ విజిల్స్ వేస్తుంది.

బాలీవుడ్‌ లో రెమో డి.సౌజా తెర‌కెక్కిస్తున్న ఎబిసిడి సిరీస్ అంతా స్టెప‌ప్ ప్రేర‌ణ‌తో తెర‌కెక్కిన‌దే. ఇప్ప‌టికే రెండు సినిమాలు బాక్సాఫీస్ వ‌ద్ద బంప‌ర్ హిట్లుగా నిలిచాయి. తెలుగులో `స్టైల్` లాంటి సినిమా స్టెప‌ప్ స్ఫూర్తితో తెర‌కెక్కి యూత్‌ ని ఉర్రూత‌లూగించింది. ఇప్పుడు డ్యాన్స్ బేస్డ్ సినిమాల‌ సిరీస్‌ లోనే త‌మిళంలో తెర‌కెక్కిన ల‌క్ష్మి రిలీజ‌వుతోంది. ఇందులో ల‌క్ష్మి అనే డ్యాన్స్ స్టూడెంట్ కోణంలో ఒక డ్యాన్సింగ్ లెజెండ్ స్టోరీని తెర‌పై చూపిస్తున్నారు. ఏ.ఎల్. విజ‌య్ ఈ చిత్రానికి ద‌ర్శ‌క‌త్వం వ‌హిస్తున్నారు. సీకే ఎంట‌ర్‌ టైన్‌ మెంట్స్ - ట్రైడెంట్ ఆర్ట్స్ సంస్థ‌లు ఈ చిత్రాన్ని తెలుగులో ఆగ‌స్టు 24న‌ రిలీజ్ చేస్తున్నాయి.

ఇప్ప‌టికే రిలీజైన ట్రైల‌ర్లు - టీజ‌ర్లు ఆక‌ట్టుకున్నాయి. తాజాగా థియేట్రిక‌ల్ ట్రైల‌ర్ రిలీజైంది. ఈ ట్రైల‌ర్ ఆద్యంతం బేబి దిత్య మెరుపు విన్యాసాలు క‌ట్టిప‌డేస్తున్నాయి. డ్యాన్సుల్లో దిత్య ప్ర‌తిభ మైమ‌రిపిస్తోంది. ఇంట్లో మ‌మ్మీ వ్య‌తిరేక‌త‌తో పాటు - ఎన్నో ప్ర‌తికూల‌త‌ల మ‌ధ్య ల‌క్ష్మి త‌న క‌ల‌ను నెర‌వేర్చుకునేందుకు ఏం చేసింది? అన్న‌ది తెర‌పై చూడాలి.  ఇందులో ఇండియ‌న్ మైఖేల్ జాక్స‌న్ ప్ర‌భుదేవా స్ఫూర్తివంత‌మైన కోచ్ పాత్ర‌లో న‌టించారు. ప్ర‌భుదేవా సంభాష‌ణ‌లు హైలైట్‌ గా నిలుస్తున్నాయి. ఐశ్వ‌ర్యా రాజేష్ - కోవై స‌ర‌ళ - స‌త్యం రాజేష్ త‌దిత‌రులు ఆస‌క్తిక‌ర పాత్ర‌ల్లో న‌టించారు.


Full View