స్నేహ గీతం.. ఇట్స్‌ మై లవ్‌ స్టోరీ.. మొదలగు సినిమాలతో పరిచయమైన దర్శకుడు మధుర శ్రీధర్‌. మనోడు ఆ తరువాత సినిమాల దర్శకత్వం కంటే ఎక్కువగా ప్రొడక్షన్‌ పైనే ఆసక్తి చూపిస్తున్నాడు. తన అసోసియేట్లతో ఓ రెండు సినిమాలు తీయడం దగ్గర నుండి.. నీలకంఠ తో మాయ.. అలాగే ఇప్పుడు ఏకంగా కొణిదెల నిహారిక తొలి వెండితెర ఎంట్రీ మూవీని కూడా ఈయనే నిర్మిస్తున్నాడు.
ఒక్కసారి ఈ ఫిలిం ప్రొడక్షన్‌ ఊబిలోకి అడుగుపెడితే.. ఇక ఆగడం అంటూ ఉండదేమో.. ఇప్పుడీయన ఒక వెబ్ సీరిస్‌ ను కూడా ప్రొడ్యూస్‌ చేశాడట. ఇది ఆషామాషీ ఫిలిం కాదు.. ఎందుకంటే ఇందలో నటిస్తోంది ఏకంగా ప్రపంచ ప్రఖ్యాత క్రికెట్‌ దిగ్గజం బ్రియన్‌ లారా. ఈ లెఫ్ట్‌ హ్యాండ్‌ వెస్టిండీస్‌ బ్యాట్సమన్‌ గురించి తెలుసుకోవాలనే కుతూహలం చాలామందికి ఉంటుంది. అందుకే 46 ఏళ్ల లారా తాను ప్రాక్టీస్ చేసే విధానం నుండి క్రికెట్‌ ఆడే విధానాల వరకు ఏదైనా అభిమానులతో పంచుకుంటే బాగుంటుందని ఒక పార్టీలో కలసిన ఈ క్రికెటర్‌ కు శ్రీధర్‌ సూచించగా.. వెంటనే.. సరే అదేదో మీరే చేయండి అన్నాడట లారా. ఇమ్మీడియట్‌ గా స్పందించిన శ్రీధర్‌ కూడా.. తన టీమ్‌ ను లారా ఉండే పోర్ట్‌ ఆఫ్‌ స్పెయిన్‌ కు పంపించేసి.. ఒక స్ర్కిప్టు రెడీ చేయించి.. ఒక 5 భాగాల వెబ్ సీరిస్‌ తో ముందుకొచ్చాడు. ఈ సీరిస్‌ లో లారా చెప్పిన సీక్రెట్లు అనేకం.
త్వరలోనే అమెరికాలో జరుగుతున్న మాజీ క్రికెట్‌ లెజెండ్‌ ల సమరంలో లారా కూడా పాల్గొంటున్నాడు. ఈ సమయంలో ఒక తెలుగు దర్శకుడు ఇలా ఈ దిగ్గజం గురించి సీక్రెట్లను రివీల్‌ చేయడం అభినందించదగిన విషయమే. కాకపోతే ఈ వీడియోలు ఆన్‌ లైన్‌ లో 3 డాలర్లు ఖర్చు చేసి మాత్రమే చూడగలం. క్రికెట్‌ అభిమానులకు అదొక లెక్క కాదులేండి.