పిక్ టాక్: ఈ మాస్ కాంబోలో సినిమా వస్తే బాక్సాఫీస్ బద్దలే..!

సూపర్ స్టార్ మహేష్ బాబు - సెన్సేషనల్ డైరెక్టర్ సందీప్ రెడ్డి వంగా కాంబినేషన్ లో ఓ సినిమా తెరకెక్కనుందని అప్పట్లో వార్తలు వచ్చిన సంగతి తెలిసిందే. ఈ ప్రాజెక్టుకు సంబంధించి ఇద్దరి మధ్య చర్చలు జరిగాయని.. మహేష్ కూడా దీనికి గ్రీన్ సిగ్నల్ ఇచ్చాడని అన్నారు. 'అర్జున్ రెడ్డి' తో నేషనల్ వైడ్‌ గా సెన్సేషన్ క్రియేట్ చేసిన సందీప్ తో మహేష్ సినిమా చేస్తున్నాడనగానే ఫ్యాన్స్ కూడా ఖుషీ అయ్యారు. అయితే అవన్నీ రూమర్స్ గానే మిగిలిపోయాయి. అయితే ఈ క్రేజీ కాంబోలో మూవీ మరోసారి తెరపైకి వచ్చింది.

సందీప్ రెడ్డి వంగా దర్శకత్వంలో మహేష్ బాబు ఓ కమర్షియల్ యాడ్ షూట్ లో పాల్గొంటున్నారు. అన్నపూర్ణ స్టూడియోస్ లో ఈ యాడ్ కి సంబంధించిన షూటింగ్ జరుగుతోంది. ఇందులో మహేష్ తో పాటు మిల్కీబ్యూటీ తమన్నా కూడా యాక్ట్ చేస్తోంది. అవినాష్ గోవర్కర్ ఫోటోగ్రఫీ చేస్తున్నారు. అయితే మహేష్ సతీమణి నమ్రత ఈ షూట్ లోకేషన్స్ లోని ఫోటోలని సోషల్ మీడియా మధ్యమాలలో షేర్ చేసింది. ఈ ఫోటోలో మహేష్ - సందీప్ ఒకరినొకరు చూసుకుంటూ దేని గురించో సీరియస్ గా డిస్కష్ చేసుకుంటున్నట్లు కనిపిస్తోంది. దీంతో ఈ మాస్ కాంబినేషన్ లో ఓ సినిమా చేస్తే బాగుంటుందని.. ఆ ప్రాజెక్ట్ సెట్ చేసే బాధ్యత తీసుకోండి అంటూ ఫ్యాన్స్ నమ్రతను రిక్వెస్ట్ చేస్తూ కామెంట్స్ పెడుతున్నారు. ప్రస్తుతం సోషల్ మీడియాలో మహేష్ - సందీప్ ప్రాజెక్ట్ గురించే చర్చ జరుగుతోంది. మరి అభిమానుల కోరిక మేరకు రాబోయే రోజుల్లో వీరి కలయికలో ఓ మూవీ వస్తుందేమో చూడాలి.