మహేశ్ అంత సేపు మాట్లాడటమేమిటి చెప్మా..?

రెండు మూడు రోజులుగా పేపర్లు.. టీవీ ఛానళ్లు.. వెబ్ సైట్లు.. ఇలా ఎక్కడ చూసినా మహేశ్ బాబే కనిపిస్తున్నాడు. పలుకే బంగారమా అన్నట్లుగా ఉండే ప్రిన్స్ నోటి నుంచి ముత్యాల్లా జారువాలుతున్న మాటల్ని ఏరుకుంటూ ఆయన అభిమానులు విపరీతంగా ఎంజాయ్ చేస్తున్నారు. ఆచితూచి అన్నట్లుగా పొదుపుగా బయట కనిపించే మహేశ్ బాబు ఏ ఛానలో చూసినా.. ఏ పేపర్ ను చూసినా కనిపించేయటం ఆసక్తికరంగా మారిందనే చెప్పాలి.

ఎందుకిలా అంటే.. ఈ వారంలో విడుదలవుతున్న బ్రహ్మోత్సవం కారణంగానే. సినిమా విడుదలయ్యాక ప్రమోషన్ స్టార్ట్ చేయటం ఒక వ్యూహం అయితే.. సినిమా విడుదల కావటానికి వారం.. పది రోజుల ముందు నుంచే సినిమా మీద విపరీతమైన హైప్ క్రియేట్ అయ్యేలా చేయటం మరో వ్యూహం.  ఈ మధ్య కాలంలో విడుదలవుతున్న భారీ సినిమాల్లో కొన్నింటికి రెండో వ్యూహాన్ని అనుసరిస్తున్నారు. నిజానికి ఈ వ్యూహానికి ఆద్యుడు రాజమౌళి అని చెప్పాలి. ప్రతిష్ఠాత్మకంగా నిర్మించిన తన బాహుబలి చిత్రానికి మరింత ప్రచారం కల్పించేలా.. సినిమా ఫలితం ఎలా ఉన్నా.. ఒక్కసారైనా బాహుబలిని చూడాలన్న ఆసక్తి కలిగించేలా సినిమా ప్రచారాన్ని విడుదలకు ముందే నిర్వహించి సక్సెస్ అయ్యారు.

ఇదే విధానాన్ని పాటించిన మహేశ్.. తన శ్రీమంతుడి చిత్రంలో ఇదే వ్యూహాన్ని కొంతమేర ఫాలో అయ్యారు. తాజా బ్రహ్మోత్సవంలో మాత్రం మొత్తంగా ఫాలో అయిపోవటంతో.. మీడియాలో ఇప్పుడు ఎక్కడ చూసినా మహేశ్ బాబు కనిపించే పరిస్థితి. ఈ శుక్రవారం విడుదల కానున్న బ్రహ్మోత్సవానికి సంబంధించిన ఉత్సావాలు అప్పుడే షురూ అయిపోయాయన్న చందంగా మీడియాలో మహేశ్ సందడి నెలకొందని చెప్పాలి.