ఎప్పుడెప్పుడు చూద్దామా అని ఉంది-మహేష్

తన తండ్రి సూపర్ స్టార్ కృష్ణ కథానాయకుడిగా నటించిన కొత్త సినిమా ‘శ్రీ శ్రీ’ ఎప్పుడెప్పుడు చూద్దామా అని ఆత్రుతగా ఉందంటున్నాడు నయా సూపర్ స్టార్ మహేష్ బాబు. ‘శ్రీ శ్రీ’ ఆడియో వేడుకకు ముఖ్య అతిథిగా విచ్చేసిన మహేష్ మాట్లాడుతూ.. ‘‘నాలుగైదు నెల‌ల క్రితం శ్రీ శ్రీ సినిమాలో నాన్న‌గారి గెట‌ప్‌ను పేప‌ర్‌లో చూశాను. చాలా ఎగ్జ‌యిటింగ్‌ గా అనిపించింది. ఎందుకంటే నాన్న‌గారికి ఉన్న అభిమానుల్లో అతి పెద్ద అభిమానిని నేనే. నాన్నగారితో ఈ సినిమా చేసిన శివ గారికి థ్యాంక్స్. ట్రైల‌ర్ చూడ‌గానే సినిమా చూడాలనే ఆత్రుత మొద‌లైంది. ఎప్పుడూ నాన్న‌గారు నా సినిమాల‌కు అతిథిగా వ‌స్తుంటారు. ఇవాళ నేను నాన్న‌గారి సినిమాకు అతిథిగా రావడం ఆనందంగా ఉంది. ఈ  సినిమా పెద్ద హిట్ కావాల‌ని మ‌న‌స్ఫూర్తిగా కోరుకుంటున్నాను’’ అన్నాడు.

కృష్ణ అల్లుడు, హీరో సుధీర్‌ బాబు మాట్లాడుతూ.. ‘‘కృష్ణగారు లేకపోతే నేను ఎక్కడ వుండేవాడినో తెలియదు. ఎంత డబ్బు సంపాదించినా.. ఇండస్ట్రీకి వచ్చేవాడిని కాదు. ప్రేమకథా చిత్రమ్‌, భలే మంచి రోజు లాంటి సినిమాలతో అభిమానుల్ని సంపాదించుకున్నాను. అదంతా కృష్ణగారి వల్లే. శ్రీ శ్రీ సినిమాలో నేను గెస్ట్ రోల్ చేస్తున్నట్లు వార్తలొచ్చాయి. అవి చూసి నవ్వుకున్నాను... ఆయన సినిమాలో నేను గెస్ట్ రోల్ చేయడమేంటి అని. కృష్ణ గారి సినిమాల్లో జూనియర్‌ ఆర్టిస్ట్‌ అవకాశం వచ్చినా చేయడానికి నేను రెడీ. ‘శ్రీశ్రీ’లో చిన్న క్యారెక్టర్‌ లో నటించాను. ఎన్ని సినిమాల్లో చేసినా నాకు ఇంత సంతృప్తి దొరకదు. ఇది నా అదృష్టంగా భావిస్తున్నాను. డబ్బింగ్‌ చెప్పేటప్పుడు సినిమా చూశాను. చాలా బాగుంది. మా అబ్బాయి దర్శన్‌ ఈ సినిమాతో లాంచ్‌ అవుుతన్నాడు’’ అని చెప్పాడు.