మురుగా.. కత్తికి పదును పెడతావా?

మెగాస్టార్ చిరంజీవి రీ ఎంట్రీ ప్రాజెక్ట్ ఫైనల్ అయిపోయింది. కత్తితో రీఎంట్రీకి ఫిక్స్ అయ్యారు చిరు. విజయ్ హీరోగా.. మురుగదాస్ స్క్రీన్ ప్లే, దర్శకత్వం వహించిన కత్తి గతేడాది పెద్ద హిట్. 125 కోట్ల కలెక్షన్స్ తో కోలీవుడ్ ఇండస్ట్రీకే పెద్ద హిట్ గా నిలిచింది కత్తి. అంతకుముందు తుపాకితో హిట్ కొట్టిన విజయ్-మురుగదాస్ కాంబినేషన్.. కత్తితో మొత్తం రికార్డలన్నిటినీ నరికేశారు.

ఇప్పుడు చిరు కూడా మురుగదాస్ స్టోరీనే ఎంచుకున్నారు. అప్పట్లో బ్లాక్ బస్టర్ అయిన ఠాగూర్ కూడా... తమిళ్ లో మురుగదాస్ తీసిన రమణకు రీమేక్. మురుగ కాన్సెప్ట్ లకు ఫిదా అయిన మెగాస్టార్.. అప్పట్లో డైరెక్ట్ గా తనే డైరెక్టర్ ఛాన్స్ ఇచ్చాడు. స్టాలిన్ అంటూ వచ్చిన ఆ మూవీకి ఆకట్టుకోలేకపోయింది. చిరంజీవి లాంటి స్టార్ తో తీసే సినిమానా ఇది అంటూ.. విమర్శలు కూడా ఎదుర్కోవాల్సి వచ్చింది. అఫ్ కోర్స్.. దీన్నే హిందీలో ట్రై చేసి సల్లూ భాయ్ కూడా దెబ్బ వేయించుకున్నాడు లెండి.

స్టాలిన్ దెబ్బ తర్వాత గజినీతో సూపర్ సక్సెస్ సాధించాడు మురుగదాస్. మళ్లీ సెవెంత్ సెన్స్ తో ఫ్లాప్ రుచి చూశాడు. ఇలా ఉంటుంది మురుగదాస్ కెరీర్. గతంలో ఎదురైన అనుభవంతో చిరు కోసం ఏమన్నా మార్పులు చేస్తాడా అనుకుంటున్నారు ఇండస్ట్రీవర్గాలు. అయితే.. ఇది పక్కా రెడీమేడ్ స్క్రిప్ట్. మెగాస్టార్ ఇమేజ్ కోసం.., మార్పు చేర్పులంటే మురుగ ఏం చేస్తాడో ? ఒకవేళ తను చేయకపోయినా.. కావాల్సినట్లు మార్చుకోవడానికి మాస్ డైరెక్టర్ వినాయక్ ఉన్నాడు కదా. అందులోను అప్పుడు మురుగదాస్ స్టోరీ అయిన ఠాగూర్ ని, చిరుతో తీసినది కూడా వినాయక్ నే. ఇప్పుడు కూడా ఠాగూర్ లాగా మెగాస్టార్ కి తగినట్లుగా మార్చేస్తాడు లెండి !