చైతూ.. అతనొక్కడికే గ్రీన్ సిగ్నలిచ్చాడు

సొంత బేనర్లో ‘రారండోయ్ వేడుక’ పూర్తి చేసిన అక్కినేని నాగచైతన్య.. ఈ సినిమా పని ముగించగానే కృష్ణ అనే కొత్త దర్శకుడితో ఓ థ్రిల్లర్ మూవీని మొదలుపెట్టిన సంగతి తెలిసిందే. ఈ చిత్రాన్ని వారాహి చలనచిత్రం బేనర్ మీద సాయి కొర్రపాటి నిర్మిస్తున్నారు. ఇది రివెంజ్ బ్యాక్ డ్రాప్ లో సాగే థ్రిల్లర్ అని సమాచారం. ఈ సినిమా ఇంకో రెండు నెలల్లోనే పూర్తయిపోతుంది. మరి చైతూ దీని తర్వాత చేయబోయే సినిమా ఏదనే విషయంలో కొన్నాళ్ల నుంచి రకరకాల రూమర్లు వినిపించాయి. ‘ప్రేమమ్’ సూపర్ సక్సెస్ అయ్యాక చైతూ కోసం చాలామంది దర్శకులు.. నిర్మాతలు ప్రయత్నించారు. కానీ చైతూ అప్పటికే కమిటైన సినిమాల మీద దృష్టిపెట్టాడు తప్ప.. వేరే కమిట్మెంట్లు ఏమీ ఇవ్వలేదు.

తాజాగా ‘రారండోయ్ వేడుక చూద్దాం’ ప్రమోషన్లలో భాగంగా చైతూ మాట్లాడుతూ.. తన ఫ్యూచర్ ప్రాజెక్టులపై క్లారిటీ ఇచ్చే ప్రయత్నం చేశాడు. ఇప్పుడు చేస్తున్న థ్రిల్లర్ మూవీ కాకుండా చైతూ కమిట్మెంట్ ఇచ్చింది ఒక్క చందూ మొండేటికేనట. చందూ తనకు ఒక లైన్ చెప్పాడని.. అది నచ్చిందని.. దాని మీద వర్కవుట్ చేయమని చెప్పానని.. ఇంకో నెల రోజుల్లో ఈ సినిమాపై ఓ క్లారిటీ వస్తుందని చైతూ తెలిపాడు. ఇది కాక ఇంకెవరికీ తాను ఓకే చెప్పలేదని చైతూ అన్నాడు. ఇంద్రగంటి మోహనకృష్ణతో ఇంతకుముందు అనుకున్న సినిమా వర్కవుట్ కాలేదని.. ఆయనతో ఓ సినిమా చేసే అవకాశాలు లేకపోలేదని చైతూ తెలిపాడు. ఇంకో రెండు మూడు ప్రాజెక్టుల మీద చర్చలు జరుగుతున్నాయని.. పూర్తి వివరాలు తర్వాత వెల్లడిస్తానని చైతూ చెప్పాడు. కాబట్టి ‘ప్రేమమ్’ కాంబినేషన్ రిపీటవ్వడం పక్కా అన్నమాట. ఈసారి వీళ్లిద్దరూ డైరెక్ట్ మూవీనే చేయబోతున్నారు. మరి చందూ నిఖిల్‌తో కార్తికేయ-2ను ముందు మొదలుపెడతాడా.. లేక చైతూ సినిమానే ముందు పట్టాలెక్కిస్తాడా?

Like Us on Facebook : https://www.facebook.com/Tupakidotcom/