మ‌ళ్లీ నిర్మాత‌గా నితిన్‌.. హీరో ఎవ‌రంటే?

నితిన్ సినిమాల్లో చాలా వాటికి అత‌డి తండ్రి సుధాక‌ర్ రెడ్డి హ్యాండ్ ఉంది. కొన్ని సినిమాల్ని ఆయ‌నే నిర్మించారు. కొన్ని సినిమాల‌కు బ్యాక‌ప్ ఇచ్చాడు. నిర్మాతగా నితిన్ సిస్ట‌ర్ నిఖిత రెడ్డి పేరు ప‌డేది. ఐతే తొలిసారి ‘అఖిల్’ సినిమాకు నిర్మాత‌గా నితినే వ్య‌వ‌హ‌రించాడు. కానీ ఆ సినిమా ఆశించిన ఫ‌లితాన్నివ్వ‌లేదు. ఐతే ఇప్పుడు నితిన్ మ‌రోసారి నిర్మాత పాత్ర‌లోకి మారుతున్న‌ట్లు స‌మాచారం. అత‌ను మ‌రో యువ క‌థానాయ‌కుడు నిఖిల్ హీరోగా సినిమాను నిర్మించ‌బోతున్నాడ‌ట‌. దీనికి ద‌ర్శ‌కుడు ఎవ‌ర‌న్న‌ది ఇంకా బ‌య‌ట‌కు రాలేదు కానీ.. నిఖిల్ హీరోగా నితిన్ సినిమాను నిర్మించ‌డం మాత్రం ఖాయం అంటున్నారు.

స్వామి రారా.. కార్తికేయ‌.. సూర్య వెర్స‌స్ సూర్య సినిమాల‌తో హ్యాట్రిక్ కొట్టిన నిఖిల్.. శంక‌రాభ‌ర‌ణంతో బోల్తా కొట్టాడు. ఐతే తాజాగా ‘ఎక్క‌డికి పోతావు చిన్న‌వాడా’ రూపంలో సూప‌ర్ హిట్ ఖాతాలో వేసుకుని అంద‌రి దృష్టినీ ఆక‌ర్షించాడు. అత‌డితో సినిమాలు చేయ‌డానికి చాలామంది లైన్లో ఉన్నారు. అగ్ర నిర్మాత దిల్ రాజు సైతం నిఖిల్ హీరోగా ఓ సినిమా చేస్తాడ‌ని అంటున్నారు. ఇంకా ఇద్ద‌రు ముగ్గురు నిర్మాత‌లు అత‌డితో సినిమా కోసం ప్ర‌య‌త్నాలు చేస్తున్నారు. నిఖిల్ ప్ర‌స్తుతం ‘స్వామిరారా’తో త‌న కెరీర్ ను మ‌లుపు తిప్పిన సుధీర్ వ‌ర్మ ద‌ర్శ‌క‌త్వంలో ‘కేశ‌వ’ అనే మూవీ చేస్తున్నాడు. ఇది రివెంజ్ బ్యాక్ డ్రాప్ లో సాగే థ్రిల్ల‌ర్ అని స‌మాచారం.

Like Us on Facebook : https://www.facebook.com/Tupakidotcom/