శర్వా సినిమా ఎక్కడ సుధీర్?

తన మొదటి సినిమా స్వామి రారాతోనే ఇండస్ట్రీ దృష్టిని ఆకర్షించిన దర్శకుడు సుధీర్ వర్మ  శర్వానంద్ తో చేస్తున్న కొత్త సినిమా షూటింగ్ సగం దాకా పూర్తయినా ఈమధ్య కాలంలో  దాని తాలూకు ఎలాంటి అప్ డేట్స్ బయటికి రావడం లేదు. నిజానికి ఈ సినిమా ఎప్పుడు కంటిన్యూ చేస్తారు  అనే క్లారిటీ కూడా ప్రస్తుతానికి  లేదు. స్వామిరారా తర్వాత నాగ చైతన్యతో చేసిన దోచేయ్ సుధీర్ వర్మకు ఆశించిన ఫలితం ఇవ్వలేదు. దానికి తోడు నిఖిల్ తో చేసిన తన మూడో సినిమా కేశవ కాస్ట్ పరంగా హిట్ అనిపించుకుందే తప్ప ప్రత్యేకంగా చెప్పుకునే రిజల్ట్ అయితే కాదు. తర్వాత  ఎంతో ఇష్టపడి స్క్రీన్ ప్లే ఇచ్చిన కిరాక్ పార్టీ కూడా డిజాస్టర్ గానే మిగిలింది. ఈ నేపధ్యంలో సుధీర్ వర్మ అసలు ఏ ప్రాజెక్ట్ మీద ఉన్నాడా అనే అనుమానం కలగడం సహజం.

శర్వానంద్ ప్రస్తుతం హను రాఘవపూడి దర్శకత్వంలో పడి పడి లేచే మనసు షూటింగ్ లో బిజీ గా ఉన్నాడు. చిన్న బ్రేక్ లో ఉన్నప్పటికీ మరికొద్ది రోజుల్లో రీ స్టార్ట్ అయిపోతుంది. డిసెంబర్ విడుదల ఖరారు చేస్తూ పోస్టర్లు కూడా వదిలారు.ఎంత లేదన్నా దానికోసం మరో రెండు నెలలు శర్వానంద్ కేటాయించాల్సి వచ్చేలా ఉంది. మరి సుధీర్ వర్మ తో చేస్తున్న  సినిమాకు కీలకమైన ఫారిన్ షెడ్యూల్ బాలన్స్ ఉన్న నేపథ్యంలో ఇది ఇంకా ఎంత ఆలస్యం కావొచ్చు అనే  సమాచారం తెలియడం  లేదు. 1990 బ్యాక్ డ్రాప్ లో వైజాగ్ సిటీలో జరిగినట్టుగా చూపించే వెరైటీ  కాన్సెప్ట్ తో ఇది రూపొందుతోందని గతంలో సెట్స్ కి సంబందించిన ఫోటోలు కూడా బయటికి వచ్చాయి. కానీ ఆ తర్వాత దీని ఊసు వినిపించడం లేదు. మరి వీటికి చెక్ పడాలి అంటే ట్విట్టర్ లో యాక్టివ్ గా ఉండే సుధీర్ వర్మ అక్కడైనా సమాధానం చెబితే బెటర్.