రామరాజు ఫర్‌ భీమ్‌ : అక్కడ మోత మ్రోగించాలనుకుంటున్న ఫ్యాన్స్‌

ఈమద్య కాలంలో హీరోల ఫ్యాన్స్‌ సోషల్‌ మీడియాలో తమ స్టామినా చూపించేందుకు తీవ్రంగా ప్రయత్నాలు చేస్తున్నారు. తమ హీరోకు ఉన్న ఫ్యాన్‌ ఫాలోయింగ్‌ సోషల్‌ మీడియా ట్రెండ్డింగ్‌.. యూట్యూబ్‌ వ్యూస్‌ తో చూపించాలనే ఉద్దేశ్యంతో తీవ్రంగా కష్టపడుతున్నారు. స్టార్‌ హీరో బర్త్‌ డే వచ్చిందంటే హ్యాష్‌ ట్యాగ్‌ తో రికార్డులు సృష్టిస్తున్నారు. మన తెలుగు హీరోల ఫ్యాన్స్‌ కు ఏకంగా ప్రపంచ రికార్డు సైతం దక్కింది. ఇక ఈనెల 22న రాబోతున్న ఆర్‌ఆర్‌ఆర్‌ సినిమాలోని ఎన్టీఆర్‌ లుక్‌ వీడియోకు సోషల్‌ మీడియాలో సరికొత్త నెంబర్స్‌ ను నమోదు చేయాలంటూ నందమూరి ఫ్యాన్స్‌ తీవ్రంగా ప్రయత్నాలు చేస్తున్నారు.

రామ్‌ చరణ్‌ వాయిస్‌ ఓవర్‌ తో ఎన్టీఆర్‌ కొమురం భీమ్‌ పాత్ర మేకింగ్‌ తో ఉండబోతున్న వీడియోకు 24 గంటల్లో అత్యధిక వ్యూస్‌ రావడంతో పాటు అత్యధిక లైక్స్‌ వచ్చేలా నందమూరి ఫ్యాన్స్‌ సోషల్‌ మీడియాలో ఇప్పటికే ఫ్యాన్స్‌ కు ట్రెండ్‌ అలర్ట్‌ ఇచ్చారు. 24 గంటల పాటు హ్యాష్‌ ట్యాగ్‌ ను ట్విట్టర్‌ లో కంటిన్యూస్ గా షేర్‌ చేస్తూ వీడియోను కూడా పోస్ట్‌ చేస్తూ ట్విట్టర్‌ లో మరియు యూట్యూబ్‌ లో ఒకేసారి ఒకే రోజు రెండు రికార్డులు ఎన్టీఆర్‌ ఫ్యాన్స్‌ దక్కించుకోవాలని ప్రయత్నాలు చేస్తున్నారు.

ఆర్‌ఆర్‌ఆర్‌ సినిమాలో కొమురం భీమ్‌ పాత్రలో నటిస్తున్న ఎన్టీఆర్‌ పులితో చేసే ఫైట్‌ సినిమాకే హైలైట్‌ గా నిలుస్తుందంటూ చిత్ర యూనిట్‌ సభ్యులు చెబుతున్నారు. సినిమాలో రామ్‌ చరణ్‌ మరియు ఎన్టీఆర్‌ లు నువ్వా నేనా అన్నట్లుగా నటించారు. వారి అభిమానులు కూడా సోషల్‌ మీడియాలో వారి పాత్రలకు ఢీ అంటే ఢీ అన్నట్లుగా ప్రచారం చేస్తూ రికార్డులు బద్దలు కొట్టే ప్రయత్నం చేస్తున్నారు.