పవన్ వెర్సస్ ఎన్టీఆర్ వెర్సస్ బాలయ్య

సంక్రాంతికి మెగాస్టార్ చిరంజీవి-నందమూరి బాలకృష్ణల మధ్య బాక్సాఫీస్ పోరు జనాల్లో భలే ఆసక్తి రేకెత్తించింది. ఆ పోరు బాక్సాఫీస్ ను కూడా కళకళలాడించింది. ఆ తర్వాత మళ్లీ అలాంటి పోరు ఇప్పుడిప్పుడే సాధ్యమయ్యేలా కనిపించట్లేదు. వేసవిలో స్టార్ హీరోల మధ్య డైరెక్టర్ వార్ ఏమీ లేదు. ఐతే ఈ ఏడాది దసరా సమయానికి రసవత్తర బాక్సాఫీస్ పోరు చూడబోతున్నట్లే కనిపిస్తోంది. పవన్ కళ్యాణ్.. జూనియర్ ఎన్టీఆర్.. నందమూరి బాలకృష్ణ దసరాకు ముందు వారాల్లో బాక్సాఫీస్ పోరుకు దిగేలా కనిపిస్తున్నారు.

పూరి జగన్నాథ్ దర్శకత్వంలో నందమూరి బాలకృష్ణ హీరోగా తెరకెక్కుతున్న కొత్త సినిమాను సెప్టెంబరు 29న విడుదల చేయనున్నట్లు ప్రారంభోత్సవం రోజే ప్రకటించిన సంగతి తెలిసిందే. ప్రస్తుతం షెడ్యూళ్లు కూడా దాని ప్రకారమే సాగుతున్నాయి. ఎట్టి పరిస్థితుల్లోనూ చెప్పిన డేటుకే సినిమాను రిలీజ్ చేస్తామని పూరి అంటున్నాడు. మరోవైపు పవన్.. ఎన్టీఆర్ సినిమాలు ముందు అనుకున్నది ఆగస్టుకే కానీ.. ఇవి అనుకున్న సమయానికి సెట్స్ మీదికి వెళ్లకపోవడంతో రిలీజ్ డేట్ ఆలస్యమై సెప్టెంబర్లోనే ప్రేక్షకుల ముందుకొస్తాయన్నది తాజా సమాచారం.

ఇటీవలే ఎన్టీఆర్ సినిమా ‘జై లవకుశ’ మోషన్ పోస్టర్ లాంచ్ సందర్భంగా ఈ చిత్రాన్ని సెప్టెంబరు రెండో వారంలో రిలీజ్ చేయబోతున్నట్లు కన్ఫమ్ చేశారు. మరోవైపు ఆగస్టు 11కు పక్కా అన్న పవన్-త్రివిక్రమ్ సినిమా కూడా షూటింగ్ ఆలస్యంగా మొదలవడం వల్ల సెప్టెంబరుకు వాయిదా పడిందని.. ఈ చిత్రం మూడో వారంలో వచ్చే అవకాశాలున్నాయని తెలుస్తోంది. అంటే సెప్టెంబరులో వరుసగా మూడు వారాల్లో మూడు భారీ చిత్రాలు సందడి చేయబోతున్నాయన్నమాట.

Like Us on Facebook : https://www.facebook.com/Tupakidotcom/