చేతినిండా సినిమాలున్నా హిట్స్ లేని యువహీరో..!

టాలీవుడ్ యువహీరో రాజ్ తరుణ్.. కొన్నేళ్లుగా కెరీర్ పరంగా ఇబ్బందులు పడుతున్నాడు. ప్రస్తుతం ఖచ్చితంగా హిట్ కావాల్సిందే అనే పరిస్థితిలో ఉన్నాడు ఈ హీరో. ఇటీవలే 'పవర్ ప్లే' అనే థ్రిల్లర్ మూవీతో ప్రేక్షకుల ముందుకొచ్చాడు. కానీ పవర్ ప్లే కూడా హిట్ అవ్వకుండా హ్యాండ్ ఇవ్వడంతో సైలెంట్ అయిపోయాడు. దాదాపు 6 సంవత్సరాలుగా రాజ్ తరుణ్ ఓ సాలిడ్ హిట్ కోసం విశ్వప్రయత్నాలు చేస్తున్నాడు. ఉయ్యాలా జంపాల, సినిమా చూపిస్తా మావ, కుమారి 21ఎఫ్ సినిమాల తర్వాత ఒక సూపర్ హిట్ కూడా రాజ్ ఖాతాలో పడలేదు. ఇన్నేళ్లలో చాలా సినిమాలే చేసాడు కానీ చేసినవన్నీ బెడిసి కొట్టడంతో వెరైటీ జానర్స్ ట్రై చేస్తున్నాడు. ఈ హీరోను లవ్, కామెడీ జానర్స్ లో చూసి జనాలకు బోర్ కొట్టేసింది.

ప్రస్తుతం కొత్తరకం సినిమాలనే ప్రేక్షకులు ఇష్టపడుతున్నారు. అందుకే రూట్ మార్చి థ్రిల్లర్ మూవీ చేసాడు. కెరీర్ ప్రారంభంలో అవకాశాలు వస్తున్నాయి కదా అని కథల విషయంలో అజాగ్రత్తగా సినిమాలు చేసుకుంటూ పోయాడు. అనుకోని రేంజిలో ప్లాప్ లతో వెనకబడి పోయాడు. ఇప్పుడు మళ్లీ హిట్టు కోసం నానాతంటాలు పడుతున్నాడు. ఇదిలా ఉండగా.. సినిమాలు హిట్ కాకపోయినా రాజ్ చేతిలో అవకాశాలు మాత్రం బాగానే ఉన్నాయి. ఇటీవలే ఆ సినిమాల విషయాలు బయటపెట్టాడు. డైరెక్టర్ శ్రీనివాస్ గవిరెడ్డితో రెండో సినిమా ఇప్పటికే పూర్తి కావచ్చిందట. అలాగే డైరెక్టర్ విరించి వర్మతో మరో సినిమా 60 శాతం పూర్తయిందని చెప్పాడు. అలాగే వీరంకి శాంటో అనే నూతన దర్శకుడితో ఓ సినిమా పూర్తి కావచ్చిందని చెప్పాడు. వీటన్నింటితో పాటు విజయ్ కుమార్ కొండాతో హ్యాట్రిక్ సినిమా చేయనున్నట్లు ప్రకటించాడు. సురేష్ ప్రొడక్షన్స్ లో ఆ సినిమా రానుందని చెప్పుకొచ్చాడు హీరో. మరి ఈ సినిమాలతో అయినా రాజ్ తరుణ్ ఫామ్ లోకి వస్తాడేమో చూడాలి.