ముకాబులా కొత్త వెర్షన్.. ప్రభు డ్యాన్స్!

ఎఆర్ రెహమాన్ ఇప్పుడంటే స్లో అయ్యాడు కానీ 90లలో  ఆయన స్వరపరిచిన పాటలు జనాలను ఊపిపారేసేవి.  ఇక రెహమాన్ సంగీతానికి ప్రభుదేవా లాంటి డ్యాన్సర్.. శంకర్ లాంటి డైరెక్టర్ కనుక తోడైతే ఆ పాటలు చార్ట్ బస్టర్లే.  అలా చార్ట్ బస్టర్ అయిన పాటల్లో ఒకటి 'ముక్కాలా ముకాబులా'.  శంకర్ దర్శకత్వంలో తెరకెక్కిన 'ప్రేమికుడు' చిత్రంలోని ఈ పాట అప్పట్లో ట్రెండ్ సెట్టర్.  జస్ట్ డ్యాన్స్ లు మాత్రమే కాదు.. తుపాకులతో షూట్ చేసిన తర్వాత కాళ్ళు చేతులు ఫేస్ లేకుండా ప్రభు దేవా షర్టు ప్యాంట్ మాత్రమే డ్యాన్స్ చేయడం అప్పట్లో జనాలను పిచ్చెక్కించింది. గ్రాఫిక్స్ అప్పుడు కొత్త కదా అందుకే.. ఆ రెస్పాన్స్.

ఇంతకీ ఇప్పుడు ముక్కాలా ముకాబులా పాట టాపిక్ ఎందుకు వచ్చిందంటే 'స్ట్రీట్ డాన్సర్' అనే హిందీ చిత్రం కోసం ఈ పాటను రీమిక్స్ చేస్తున్నారట.  కొరియోగ్రాఫర్ కమ్ డైరెక్టర్ రెమో డిసౌజా ఈ చిత్రానికి దర్శకుడు. ఆయన గతంలో డ్యాన్స్ నేపథ్యంలో 'ఎబీసిడీ'..  'ఎబీసిడీ 2' అనే చిత్రాలను తెరకెక్కించాడు.  ఇప్పుడు కూడా వాటికి సీక్వెల్ అన్నట్టుగా డ్యాన్స్ నేపథ్యంలోనే వరుణ్ ధావన్ హీరోగా 'స్ట్రీట్ డ్యాన్సర్' చిత్రాన్ని రూపొందిస్తున్నాడు.  గత రెండు చిత్రాల్లో కీలక పాత్ర పోషించిన ప్రభు దేవా ఈ సినిమాలో కూడా నటిస్తున్నారట.  ఈ సినిమాలో ముకాబులా పాటకు ప్రభు స్వయంగా డ్యాన్స్ చేస్తున్నారట.

మరి అప్పట్లో సంచలనం సృష్టించినట్టు ఇప్పుడు ప్రభుదేవా తన డ్యాన్స్ లో మరోసారి సంచలనం సృష్టించగలడా? దర్శకుడు శంకర్ టేకింగ్ లోని మ్యాజిక్ ను రెమో డిసౌజా మ్యాచ్ చేయగలడా అనేది వేచి చూడాలి. ఏదేమైనా ఈ ముకాబులాను రీమిక్స్ చేయడం ఇప్పుడు హాట్ టాపిక్ అయింది.