మంచు లక్ష్మి పాత చింతకాయే..!

మంచు లక్ష్మి మల్టీ ట్యాలెంటెడ్‌ అనే విషయం తెల్సిందే. ఎన్నో రంగాల్లో మంచు లక్ష్మి తనదైన ముద్రను వేస్తోంది. సినిమాలో ఇప్పటికే నటిగా రాణించిన మంచు లక్ష్మి తాజాగా వెబ్‌ సిరీస్‌ తో అలరించే ప్రయత్నం చేసేందుకు ప్రేక్షకుల ముందుకు వచ్చింది. 'మిసెస్‌ సుబ్బలక్ష్మి' పేరుతో మంచు లక్ష్మి సొంతంగా ఈ వెబ్‌ సిరీస్‌ ను నిర్మించింది. అయితే వెబ్‌ సిరీస్‌ లు అంటే విభిన్నమైన కాన్సెప్ట్‌ లతో వస్తున్నాయి. సినిమా తీస్తే వర్కౌట్‌ కావేమో అనే ఉద్దేశ్యంతో, మంచి సబ్జెక్ట్‌ లు కమర్షియల్‌ ఎలిమెంట్స్‌ తక్కువగా ఉండే సబ్జెక్ట్‌ లను వెబ్‌ సిరీస్‌ లుగా చేయడం పరిపాటి.

తాజాగా మంచు లక్ష్మి నిర్మించిన 'మిసెస్‌ సుబ్బలక్ష్మి' మాత్రం చాలా రొటీన్‌ కాన్సెప్ట్‌ తో తెరకెక్కింది. భర్త నుండి స్వేచ్చ అంటూ వెళ్లి పోయిన గృహిణి ఆ తర్వాత ఎదుర్కొన్న పరిణామాలు ఏంటీ, భార్య వెళ్లి పోవడంతో ఆ భర్తను సమాజం ఎలా చూస్తుంది అనే విషయాలను కామెడీగా చూపించే ప్రయత్నం చేశారు. ఇలాంటి జోనర్‌ లో తెలుగు భాషలో ఎన్నో సినిమాలు వచ్చాయి. ఆ సినిమాల్లో కొన్ని మంచి విజయాన్ని సొంతం చేసుకోగా కొన్ని బొక్క బోర్లా పడ్డాయి. సినిమాల తరహాలోనే వెబ్‌ సిరీస్‌ లో కూడా అదే కాన్సెప్ట్‌ ను రిపీట్‌ చేయడంతో పాత చింతకాయే అనే విమర్శలు వ్యక్తం అవుతున్నాయి.

తాజాగా విడుదలైన ఈ వెబ్‌ సిరీస్‌ ట్రైలర్‌ ను చూస్తుంటే ఎంటర్‌ టైన్‌ మెంట్‌ బాగానే ఉన్నా కొత్తదనం మాత్రం ఇసుమంతైనా కనిపించడం లేదనిపిస్తుంది. మంచు లక్ష్మి భర్తగా అవసరాల శ్రీనివాస్‌ నటించాడు. కమెడియన్‌ మహేష్‌ విట్టా ఇంకా పలువురు కమెడియన్స్‌ ఉన్నారు. దాంతో ఈ వెబ్‌ సిరీస్‌ లో కామెడీ బాగానే ఉంటుందనిపిస్తుంది. జీ5 లో ఇప్పటికే ఉన్న ఈ వెబ్‌ సిరీస్‌ కు ముందు ముందు ఎలాంటి స్పందన వస్తుందో చూడాలి.