గురి తప్పని ముసలి కన్ను - టీజర్ టాక్

వైవిధ్యమైన చిత్రాలతో దూసుకుపోతున్న తాప్సీకి మరో బంపర్ ఆఫర్ తగిలినట్టు ఉంది. బాలీవుడ్ లో వరస సక్సెస్ లతో దూసుకుపోతున్న తనకు సాండ్ కి ఆంఖ్ రూపంలో మరో హిట్ దక్కే సూచనలు కనిపిస్తున్నాయి.. దీపావళికి విడుదల కాబోతున్న ఈ సినిమా టీజర్ ఇందాకా రిలీజ్ చేశారు. 1998కన్నా ముందు ఉత్తర్ ప్రదేశ్ లో జోరీ అనే గ్రామం గురించి ఎవరికి తెలియదు. అక్కడ ఉండేది తోమర్ కుటుంబం. డాక్టర్ రాజ్పాల్ అనే షూటింగ్ కోచ్ అకాడెమి పెట్టాక అందులో చేరేవారి కోసం వెతుకుతూ ఉంటాడు.

అప్పుడు కనిపిస్తారు ప్రకాశి తోమర్(తాప్సీ) చంద్రు తోమర్(భూమి పేడ్నేకర్). గన్ను పట్టుకుని కాల్చడంలో దిట్టలైన ఈ ఇద్దరినీ సానబెట్టేందుకు తీసుకుంటాడు. అందరు చూసి షాక్ తింటారు. కారణం ఇద్దరి వయసు యాభై పైనే. 70కి పైగా సంతానంతో మనవళ్ళు మనవరాళ్ళతో ఆడుకునే స్టేజి లో ఉంటారు. మరి ఈ ముసలి బామ్మలు 350 మెడల్స్ ఎలా సాధించారు అనేదే సాండ్ కి ఆంఖ్

టీజర్ ఉన్నది నిమిషంన్నర లోపే ఉన్నా కాన్సెప్ట్ ని క్లియర్ గా చెప్పేశారు. తాప్సీతో పాటు భూమి పెడ్నేకర్ తమ వయసుకు మించి చాలా ఎక్కువ బరువున్న పాత్రలు చేయడమే కాక వాటికి అనుగుణంగా బాడీ లాంగ్వేజ్ ని మలుచుకున్న తీరు బాగుంది. అయితే వృద్ధ నారిలుగా మరీ పర్ఫెక్ట్ గా మ్యాచ్ అయ్యారని చెప్పలేం కాని పెర్ఫార్మన్స్ తో ఇలాంటి చిన్న చిన్న లోపాలను కవర్ చేసే ప్రయత్నం గట్టిగా చేశారు. ఈ ఇద్దరు తప్ప ఇంకే పేరొందిన ఆర్టిస్టులు ఇందులో కనిపించడం లేదు. తుషార్ హిరనందాని దర్శకత్వం వహించిన ఈ సాండ్ కి ఆంఖ్ దీపావళికి ముస్తాబవుతోంది