సమంత డబ్బులు పెట్టదని తేల్చేశాడు

ఈ సమ్మర్లో ఏకంగా నాలుగు క్రేజీ సినిమాలతో ప్రేక్షకుల్ని పలకరించబోతోంది సమంత. తెరి (పోలీసోడు) - అ..ఆ- బ్రహ్మోత్సవం - 24.. ఇలా వేసవిలో రాబోతున్న నాలుగు సినిమాలూ మంచి క్రేజ్ ఉన్నవే. వేటికవే భిన్నమైనవే. మధ్యలో ఆమె కెరీర్ కొంచెం స్లో అయినట్లు కనిపించినా.. మళ్లీ ఇలా పీక్స్ అందుకోవడం విశేషమే. ఐతే ఇంత మంచి స్థితిలో ఉన్న సమంత.. ఓ లేడీ ఓరియెంటెడ్ మూవీ చేయడానికి తహతహలాడిపోతుండటం విశేషమే. ‘లూసియా’ సినిమాతో ప్రకంపనలు రేపిన కన్నడ దర్శకుడు పవన్ కుమార్ దర్శకత్వంలో తెరకెక్కిన ‘యు టర్న్’ను తెలుగు.. తమిళ భాషల్లో సమంత చేయాలని అనుకుంటున్న సంగతి తెలిసిందే.

రెండు భాషల్లోనూ ఈ సినిమాను సమంతే స్వయంగా నిర్మిస్తుందని కూడా వార్తలొస్తున్నాయి. ‘లూసియా’ తరహాలోనే ఇది కూడా ఓ డిఫరెంట్ సైకలాజికల్ థ్రిల్లర్. ఇప్పటిదాకా దీని గురించి సమంత అఫీషియల్ గా ఏ విషయం చెప్పలేదు. ఐతే దర్శకుడు పవన్ తొలిసారి సమంత గురించి మాట్లాడాడు. ఈ సినిమా మీద ఆమె ఆసక్తి చూపిస్తున్న మాట వాస్తవమే కానీ.. ఆమే సొంతంగా నిర్మించాలనుకుంటున్నట్లు వస్తున్న వార్తల్లో మాత్రం వాస్తవం లేదన్నాడు. ‘‘సమంత యు టర్న్ సినిమాను తమిళ - తెలుగు భాషల్లో చేయాలనుకుంటోంది. ఆమె నన్ను కలిసింది. ఐతే సొంతంగా రీమేక్ రైట్స్ తీసుకోవాలని ఏమీ అనుకోవట్లేదు. ఐతే చర్చలు ప్రాథమిక దశలోనే ఉన్నాయి. ముందు ‘యు టర్న్’ కన్నడలో విడుదల కానివ్వండి. ఆ తర్వాత చూద్దాం’’ అన్నాడు.