సెల్ఫీలతో సోనమ్ సందేశం

అనిల్ కపూర్ తనయగా బాలీవుడ్ లో అడుగు పెట్టినా తనదైన గుర్తింపు కోసం సోనమ్ కపూర్ చాలారోజులు వెయిట్ చెయ్యాల్సి వచ్చింది. ఎయిర్ హోస్టెస్ నీర్జా బానోత్ లైఫ్ స్టోరీ బేస్ గా నీర్జా సినిమాతో సోనమ్ కు కోరుకున్న బ్రేక్ లభించింది. ఆ సినిమాలో సోనమ్ నటన బాగుందంటూ ప్రశంసలు వెల్లువెత్తాయి. దాంతోపాటు లేడీ ఓరియంటెడ్ ఫిలిం అయి ఉండి కూడా మంచి కలెక్షన్లు రాబట్టింది. ఈ సినిమా తర్వాత కాస్తంత గ్యాప్ తీసుకున్న ఈ భామ ప్రస్తుతం వీర్ ది వెడ్డింగ్ సినిమాలో నటిస్తోంది.

ఓ పెళ్లి నలుగురు అమ్మాయిల జీవితాలను ఎలా మార్చేసిందనే కథతో వీర్ ది వెడ్డింగ్ సినిమా తెరకెక్కుతోంది. ఈ సినిమాలో సోనమ్ తోపాటు కరీనా కపూర్ మరో హీరోయిన్ గా నటిస్తోంది. ఓ బ్రహ్మాండమైన హిట్ తర్వాత మళ్లీ సినిమా చేస్తుండటంతో సోనమ్ షూటింగ్ సెట్లో తెగ ఉత్సాహంగా కనిపిస్తోంది. షూటింగ్ ప్లేస్ లో కరీనా తోపాటు మరో యాక్టర్ స్వర భాస్కర్ తో కలిసి సెల్ఫీలు తీసుకుని వాటిని సోషల్ మీడియాలో షేర్ చేసింది. అసలు వీర్ ది వెడ్డింగ్ సినిమా ఎప్పుడో స్టార్ట్ కావాల్సి ఉంది. ఈ సినిమా షూటింగ్ ప్రారంభిద్దామనుకునే సమయానికి కరీనా ప్రెగ్నెంట్ అనే విషయం కన్ఫర్మ్ అయింది. దీంతో ఈ సినిమా షూట్ పోస్ట్ పోన్ చేసుకోవాల్సి వచ్చింది.

వీర్ ది వెడ్డింగ్ సినిమా నిర్మిస్తోంది సోనమ్ సోదరి రియా కపూర్ కావడం విశేషం.  హిందీ సీరియళ్లతో ఫేమస్ అయిన ఏక్తా కపూర్ తో కలిసి ఈ సినిమా నిర్మిస్తోంది.  కరీనా ప్రెగ్నెన్సీ టైంలో ఈ సినిమా ఆగిపోయిందనే రూమర్లు వచ్చాయి. అందుకే షూటింగులో పాల్గొన్న వారందరితో కలిసి సెల్ఫీలు దిగి షేర్ చేయడం ద్వారా ఈ సినిమా స్టార్టయిందనే మాట చెప్పకనే చెబుతోంది సోనమ్.