పందెం కోడితో సీత దర్శకుడు ?

పేరుకు తెలుగువాడే అయినా కోలీవుడ్ లో హీరోగా నిర్మాతగా నడిగర్ సంఘం కార్యదర్శిగా తనకంటూ ప్రత్యేక స్థానాన్ని సంపాదించుకున్న విశాల్ కు తెలుగులో కూడా మంచి ఫాలోయింగ్ ఉంది. గత కొంత కాలంగా ఎన్ని డబ్బింగులు వచ్చినా సరైన సక్సెస్ అందలేదు కాని అభిమన్యుడు ఆ కొరతను దాదాపుగా తీర్చేసింది. ఆ తర్వాత వచ్చిన పందెం కోడి 2 ఆశించిన ఫలితం అందుకోలేదు కాని కమర్షియల్ గా బ్యాడ్ ప్రోడక్ట్ అనిపించుకోలేదు.

ప్రస్తుతం విశాల్ టెంపర్ రీమేక్ అయోగ్యలో నటిస్తున్న సంగతి తెలిసిందే. రాశి ఖన్నా హీరొయిన్ గా చేస్తున్న ఈ మూవీ షూటింగ్ సగానికి పైగానే అయిపోయింది. జూనియర్ ఎన్టీఆర్ మూవీ కాబట్టి పోలిక రావడం ఇష్టం లేని విశాల్ తెలుగు డబ్ చేయమని ముందే చెప్పేసాడు కాబట్టి మనదాకా ఇది రాదు. ఇకపోతే విశాల్ డైరెక్ట్ తెలుగు ఎంట్రీ గురించి ఎప్పటి నుంచో వార్తలు ఉన్నాయి కాని అదుగో ఇదుగో అంటూ కాలయాపన చేసిన ఈ హీరో ఫైనల్ గా రెడీ అవుతున్నట్టు సమాచారం.

తేజ దర్శకత్వంలో విశాల్ తెలుగు స్ట్రెయిట్ మూవీకి అంతా సిద్ధమైనట్టు ఇన్ సైడ్ టాక్. బెల్లంకొండ సాయి శ్రీనివాస్ తో సీత చేస్తున్న తేజ అది పూర్తవ్వగానే ఇది స్టార్ట్ చేసే అవకాశాలు ఉన్నాయి. హీరొయిన్ టెక్నికల్ టీం తదితర వివరాలు ఇంకా తెలియాల్సి ఉంది. విశాల్ కాబట్టి ఇది రెండు బాషలలో ఒకేసారి పూర్తవుతుంది. సీత కన్నా ముందు వెంకటేష్-బాలకృష్ణలతో షూటింగ్ దాకా వెళ్లి సినిమాలు ఆగిపోయిన నేపధ్యంలో తేజ స్క్రిప్ట్ ల విషయంలో చాలా జాగ్రత్తగా ఉంటున్నాడు. విశాల్ లైన్ విని ఇంప్రెస్ అయ్యాడట. మొత్తానికి హైదరాబాద్ అమ్మాయి అనీషను పెళ్లాడబోతున్న వేళా విశేషం విశాల్ తెలుగు సినిమా చేయబోతున్నాడు. అధికారిక ప్రకటన రావాల్సి ఉంది