'సూపర్ స్టార్' కోసం స్క్రిప్ట్ సిద్ధం చేసిన లేడీ డైరెక్టర్..!!

లేడీ ఫిల్మ్ డైరెక్టర్ సుధా కొంగర గురించి సౌత్ ప్రేక్షకులకు ప్రత్యేక పరిచయం అక్కర్లేదు. సుధా పేరు వినగానే తెలుగు రాష్ట్రానికి చెందిందని అర్ధమవుతుంది. కాకపోతే సుధ సినిమాల్లో ఓనమాలు నేర్చుకుంది. ప్రస్తుతం సుధా దర్శకురాలిగా స్టార్డం సొంతం చేసుకుంది. ఒకే ఒక్క సినిమాతో తన పేరు మార్మోగేలా చేసింది సుధా. మాధవన్, రితికా సింగ్ ప్రధాన పాత్రల్లో ఆమె రూపొందించిన ‘ఇరుదు సుట్రు’ అక్కడ సెన్సేషనల్ హిట్టయింది. దీన్ని తెలుగులో ‘గురు’ పేరుతో రీమేక్ చేసి భారీ విజయం అందుకుంది. ఇవేగాక ఇటీవలే సూర్య హీరోగా సుధ రూపొందించిన ‘ఆకాశమే నీ హద్దురా’ విడుదలై సూపర్ హిట్ అయింది. లాక్ డౌన్ కారణంగా సినిమా విడుదలకు నోచుకోలేదు. కానీ మొత్తానికి డిజిటల్ విడుదల చేశారు మేకర్స్. 'ఆకాశమే నీ హద్దురా' బాక్సాఫీస్ వద్ద మంచి విజయం అందుకొని అటు సుధాకు, ఇటు హీరో సూర్యకు ప్రశంసలు తీసుకొచ్చింది. త్వరలో తెలుగు హీరోతో సినిమా చేయాలనే ఆలోచనలో ఉందట.

ఇదిలా ఉండగా.. ప్రస్తుతం సూపర్ స్టార్ మహేష్ బాబు పరశురామ్ దర్శకత్వంలో 'సర్కారు వారి పాట' సినిమా చేస్తున్న సంగతి తెలిసిందే. ఇప్పుడు శరవేగంగా చిత్రీకరణ జరుపుకుంటున్న ఈ సినిమాను వచ్చే ఏడాది సంక్రాంతికి విడుదల చేయనున్నారు మేకర్స్. అయితే సర్కారు వారి పాట మూవీ తర్వాత మహేష్ బాబు ఎవరి సినిమా పై సంతకం చేయలేదు. ప్రస్తుతం చాలామంది దర్శకులతో తదుపరి సినిమా గురించి చర్చలు జరుపుతున్నాడు. తాజా సమాచారం ప్రకారం.. సుధా మహేష్ బాబుతో సినిమా చేయడానికి స్క్రిప్ట్ సిద్ధం చేసిందట. మహేష్ కు మల్టీలాంగ్వేజ్ ఫిల్మ్ స్క్రిప్ట్ ను త్వరలో వినిపించేందుకు రెడీ అయిందట. ప్రస్తుతం స్క్రిప్ట్‌కు సుధా తుది మెరుగులు దిద్దుతోంది. మహేష్ తో పాటు స్టార్ హీరో అజిత్ గురించి కూడా ఓ స్క్రిప్ట్ సిద్ధం చేస్తుందట సుధా. చూడాలి మరి సుధా డైరెక్షన్ లో మహేష్ సినిమా ఉంటుందేమో!