హీరో తరుణ్ భాస్కర్.. నిర్మాత దేవరకొండ

విజయ్ దేవరకొండ మామూలు హీరో నుండి ఎంత స్పీడ్ గా స్టార్ అయ్యాడో తన డెసిషన్లు కూడా అంతే స్పీడుగా తీసుకుంటున్నాడు. ఇప్పటికే రౌడీవేర్ బ్రాండ్ తో బట్టల వ్యాపారంలోకి అడుగుపెట్టిన విజయ్ రీసెంట్ గా నిర్మాతగా కూడా అవతారమెత్తాడు.  కింగ్ ఆఫ్ ది హిల్ అనే బ్యానర్ ని స్థాపించానని చెప్పాడు.  ప్రొడ్యూసర్ కేఈ జ్ఞానవేల్ రాజా తో కలిసి తన తాజా చిత్రం 'నోటా' కు నిర్మాణ భాగస్వామిగా మారాడు.

'నోటా' మీద ఉన్న భారీ అంచనాలతో పోలిస్తే బాక్స్ ఆఫీస్ రెస్పాన్స్ ఏమంత పాజిటివ్ గా లేదు.   మొదటి వారంతంలో 'నోటా' కలెక్షన్స్ చూస్తే గానీ మనం సినిమా రిజల్ట్ పై ఒక అవగాహనకు రాలేం.  'నోటా' సంగతి   పక్కన బెడితే కింగ్ ఆఫ్ ది హిల్ బ్యానర్ పై విజయ్ నిర్మించబోయే నెక్స్ట్ సినిమా ఏది?  ఈ ప్రాజెక్ట్ గురించి ఒక ఇంట్రెస్టింగ్ అప్డేట్ బయటకు వచ్చింది.  ఈ సినిమాతో విజయ్ ఒక నూతన దర్శకుడిని తెలుగు తెరకు పరిచయం చేస్తాడట..  హీరో ఎవరంటే 'పెళ్లి చూపులు' డైరెక్టర్ తరుణ్ భాస్కర్.

'పెళ్లి చూపులు' సినిమా తో తనకు సోలో  హీరోగా పెద్ద బ్రేక్ ఇచ్చిన తరుణ్ భాస్కర్ కు నటుడిగా ఇప్పుడు బ్రేక్ ఇవ్వాలని డిసైడ్ కావడం ఒక విశేషమే.  త్వరలో ఈ సినిమాకు సంబంధించిన ఇతర వివరాలు వెల్లడవుతాయట.