'బంగారు బుల్లోడు' రీమిక్స్ సాంగ్ పై బాలయ్య ఫ్యాన్స్ స్పందన ఏంటి..?

అల్లరి నరేష్ చాలా గ్యాప్ తర్వాత నటిస్తున్న రొమాంటిక్ కామెడీ ఎంటర్టైనర్ ''బంగారు బుల్లోడు''. ఈ చిత్రం జనవరి 23న ప్రేక్షకుల ముందుకు రానుంది. పి.గిరి దర్శకత్వం వహించిన ఈ చిత్రాన్ని ఏకే ఎంటర్టైన్మెంట్స్ బ్యానర్‌ పై రామబ్రహ్మం సుంకర నిర్మించాడు. నందమూరి బాలకృష్ణ బ్లాక్ బస్టర్ సినిమా ‘బంగారు బుల్లోడు’ టైటిల్ పెట్టుకున్న అల్లరోడు.. అందులోని చార్ట్ బస్టర్ ‘స్వాతిలో ముత్యమంత’ సాంగ్ ని కూడా వాడుకున్నారు. ఈ రీమిక్స్ సాంగ్ కి సంబంధించిన ప్రోమోని చిత్ర యూనిట్ విడుదల చేసింది. దీనికి సాయి కార్తీక్ సంగీతం సమకూర్చగా.. రామజోగయ్య శాస్త్రి సాహిత్యం అందించారు. ఈ సాంగ్ మిశ్రమ స్పందన తెచ్చుకుంది.

ముఖ్యంగా ఈ రీమిక్స్ సాంగ్ పట్ల బాలయ్య ఫ్యాన్స్ హ్యాపీగా లేరని తెలుస్తోంది. బాలయ్య కెరీర్ లో బెస్ట్ సాంగ్స్ లో ఒకటిగా నిలిచిన 'స్వాతిలో ముత్యమంత' రీమేక్స్ చేసి చెడగొట్టారని కామెంట్స్ చేస్తున్నారు. ఒరిజినల్ వెర్షన్ లో బాలక్రిష్ణ - రవీనా టాండన్ మధ్య తీసిన ఈ వాన పాట సూపర్ హిట్ అయింది. ఇందులో బాలయ్య స్టెప్పులు కూడా ఫ్యాన్స్ ని బాగా ఆకట్టుకున్నాయి. అయితే ఇప్పుడు ఆ సాంగ్ లో అల్లరి నరేష్ - పూజా ఝవేరిని ఉహించుకోలేక పోతున్నామని బాలయ్య అభిమానులు అంటున్నారు. రెండు సాంగ్స్ మధ్య కంపారిజన్స్ వచ్చినప్పటికీ మరికొందరు మాత్రం రీమిక్స్ ని బాగానే డీల్ చేసారని అభిప్రాయ పడుతున్నారు. ఇదిలావుండగా 'బంగారు బుల్లోడు' టైటిల్ తో పాటు ఈ సాంగ్ ని కూడా వాడుకోవడానికి మేకర్స్ ముందుగానే బాలయ్య పర్మిషన్ తీసుకున్నారని సమాచారం.