శ్రీలీలకు ఊ అంటారా?.. ఊహూ అంటారా?

అల్లు అర్జున్, సుకుమార్ కాంబినేషన్ లో తెరకెక్కుతున్న ''పుష్ప 2: ది రూల్'' సినిమా విడుదలకు నెల రోజుల సమయం కూడా లేదు. ప్రస్తుతం పోస్ట్ ప్రొడక్షన్ కార్యక్రమాలు శరవేగంగా జరుగుతున్నాయి. మరోవైపు 'కిస్సిక్' అనే ఐటెం సాంగ్ షూటింగ్ జరుగుతోంది. ఇందులో ఐటెం భామగా శ్రీలీల ఆడిపాడనుంది. రెండు రోజుల క్రితమే సెట్స్ నుంచి ఆమె స్టిల్ ఒకటి లీక్ అవ్వగా.. మేకర్స్ ఆదివారం అదే లుక్ లో ఓ పోస్టర్ ని అఫీషియల్ గా రిలీజ్ చేశారు. దీంతో 'పుష్ప 1'లో ఐటెం చేసిన సమంతను శ్రీలీల మరిపిస్తుందా? అనే డిస్కషన్ మొదలైంది.

'పుష్ప: ది రైజ్' సినిమాలో సమంత రూత్ ప్రభు చేసిన 'ఊ అంటావా మావా.. ఊహూ అంటావా మామా' పాట ఎంత పెద్ద హిట్టయ్యిందో ప్రత్యేకంగా చెప్పాల్సిన పనిలేదు. భాషతో సంబంధం లేకుండా పాన్ ఇండియాని ఊపేసిన పాట ఇది. ఇప్పుడు ''పుష్ప 2''లో అంతకుమించిన స్పెషల్ సాంగ్ ను ఆడియన్స్ ఎక్స్పెక్ట్ చేస్తున్నారు. అందుకే ఊ అంటావా రేంజ్ లో 'కిస్సిక్' పాట ఉంటుందా? ఐటెం గర్ల్ గా సామ్ ను శ్రీలీల మరిపిస్తుందా లేదా? అనే అనుమానాలు అందరిలో ఉన్నాయి.

'పుష్ప'లో ఐటెం సాంగ్ చేసేటప్పటికే సమంత స్టార్ హీరోయిన్ గా వెలుగొందుతోంది. 'ఫ్యామిలీ మ్యాన్ 2' వెబ్ సిరీస్ తో నార్త్ ఆడియన్స్ దృష్టిలో పడింది. ఆమె కెరీర్ తొలి ప్రత్యేక గీతం కావడంతో మంచి క్రేజ్ ఏర్పడింది. దీనికి తగ్గట్టుగా సాంగ్ ఉండటంతో, నెక్స్ట్ లెవల్ కు రీచ్ అయింది. ఇక్కడ 'పుష్ప 2' విషయానికొస్తే, శ్రీలీల ఇంకా స్టార్ హీరోయిన్ రేంజ్ కు వెళ్ళలేదు. అయినప్పటికీ మంచి క్రేజ్ ఉంది. తన గ్లామర్ తో, డ్యాన్స్ లతో విపరీతమైన ఫాలోయింగ్ ఏర్పరచుకుంది. ఇప్పుడు మేకర్స్ సైతం ఆమెను 'ది డ్యాన్సింగ్ క్వీన్'గా అభివర్ణించారు. 'కిస్సిక్' సాంగ్ డ్యాన్స్ ఫీస్ట్ గా, మ్యూజికల్ డిలైట్‌గా ఉండబోతోందని పేర్కొన్నారు.

శ్రీలీల మంచి డ్యాన్సర్. దానిని ఎవరూ కాదనలేరు. కాకపోతే ఐటెం సాంగ్స్ లో డ్యాన్స్ తో పాటుగా, దానికి తగ్గట్టుగా ఎక్స్ ప్రెషన్స్ ఇవ్వడం చాలా ఇంపార్టెంట్. ఊ అంటావా పాటలో ఐటెం భామగా సమంత హావభావాలు చాలా బాగా పలికించింది. అందుకే ఇప్పుడు శ్రీలీల కూడా ఆ స్థాయిలో ఎక్స్ ప్రెషన్స్ ఇవ్వగలదా? సామ్ ను అందుకోగలదా? స్పెషల్ సాంగ్ లో మెప్పించగలదా? అనే చర్చలు జరుగుతున్నాయి. రేపు సినిమా రిలీజైన తర్వాత కూడా సమంత, శ్రీలీల మధ్య కచ్చితంగా కంపేరిజన్స్ వస్తాయి. ఇద్దరిలో డ్యాన్స్ ఎవరు బాగా చేసారనే దాని కన్నా, ఐటెం సాంగ్ కు తగ్గ ఎక్స్ ప్రెషన్స్ తో కూడిన స్టెప్పులు ఎవరు బాగా వేశారనేదే జనాల్లోకి వెళ్తుంది.

అలానే 'కిస్సిక్' పాటకు దేవిశ్రీ ప్రసాద్ ఎలాంటి ట్యూన్ కంపోజ్ చేసారు? చంద్రబోస్ ఎలాంటి లిరిక్స్ రాశారు? ఆ పాటను సుకుమార్ ఎలా తెరకెక్కించారు?.. ఇలా ప్రతీ దాన్ని 'ఊ అంటావా' పాటతో కంపేర్ చేస్తారు. అన్నిటికంటే ఎక్కువగా సమంతతో శ్రీలీలను పోల్చి చూస్తారు. ఇప్పటికే విడుదలైన పోస్టర్ లో శ్రీలీలను చూస్తుంటే, గ్లామర్ ట్రీట్ ఇవ్వడంతో పాటుగా స్టెప్పులు ఇరగదీసినట్లు అనిపిస్తోంది. ఇక ఐటెం సాంగ్ లో ఎక్స్ ప్రెషన్స్ లో ఎలా రాబట్టుకోవాలో సుక్కూకి బాగా తెలుసు. ఇవన్నీ వట్కౌట్ అయితే మాత్రం శ్రీలీల స్పెషల్ సాంగ్ ప్రేక్షకుల్ని ఉర్రూతలూగించే అవకాశం ఉంది. ఇది హిట్టయితే బాలీవుడ్ జనాలు కూడా అమ్మడి వైపు చూసే ఛాన్స్ ఉంటుంది.

ఇదిలా ఉంటే 'పుష్ప 2' ప్రత్యేక గీతం కోసం శ్రీలీల భారీగానే డిమాండ్ చేసినట్లు తెలుస్తోంది. 'కిస్సిక్' పాట చేయడానికి 2 కోట్లు తీసుకుందని సోషల్ మీడియాలో కొందరు అంటున్నారు. మరికొందరు మాత్రం ఒక సినిమాకి ఎంత రెమ్యునరేషన్ తీసుకుంటుందో, అదే రేంజ్ లో ఈ సాంగ్ కోసం తీసుకుందని.. దాదాపు 3 కోట్ల వరకూ ఆమెకు ముట్టిందని ప్రచారం చేస్తున్నారు. ఇందులో ఏది నిజమో తెలియదు కానీ, శ్రీలీల స్పెషల్ సాంగ్ మాత్రం అదిరిపోతుందని ఇన్సైడ్ టాక్ వినిపిస్తోంది.