పవన్ కళ్యాణ్ OG.. ఈ ప్లాన్ వర్కౌట్ అయ్యేనా?
OG సినిమా ఒక భారీ అంచనాలున్న ప్రాజెక్టుగా ఉంది, పవన్ కళ్యాణ్ అభిమానులు ఈ సినిమాను ఎప్పుడెప్పుడు చూడాలా అని ఎదురుచూస్తున్నారు.
పవర్ స్టార్ పవన్ కళ్యాణ్ ఇటీవల ఆంధ్రప్రదేశ్ జనరల్ ఎలెక్షన్స్ లో పిఠాపురం నియోజకవర్గం నుంచి ఎమ్మెల్యే అభ్యర్థిగా పోటీ చేశారు. ఆయన గెలుపు సాధించవచ్చని ఫ్యాన్స్ ఎంతగానో విశ్వసిస్తున్నారు, జూన్ 4 ఫలితాలు వెల్లడికానున్న విషయం తెలిసిందే. ఆ రోజు కోసం అందరూ ఎంతో ఆసక్తిగా ఉన్నారు. ఎందుకంటే పవన్ కళ్యాణ్ భవితవ్యం ఆ రోజుపైనే ఆధారపడి ఉంది.
ఈ ఎన్నికల హడావిడిలో కూడా పవన్ కళ్యాణ్ తన సినిమా ప్రాజెక్టులను కన్ఫ్యూజన్ లో పెట్టొద్దని రిజల్ట్ తరువాతే షూటింగ్స్ లో పాల్గొనాలని ఫిక్స్ అయ్యాడు. ప్రస్తుతం ఆయన చేతిలో మూడు సినిమాలు ఉన్నాయి. అందులో ముందుగా వచ్చేది 'దే కాల్ హిమ్ OG' . ఈ సినిమా షూటింగ్ ప్రారంభంలో వేగంగా సాగింది కానీ, పవన్ కళ్యాణ్ ఎన్నికల ప్రచారంలో బిజీ కావడంతో, షూటింగ్ తాత్కాలికంగా నిలిపివేశారు.
ఇండస్ట్రీలో లేటెస్ట్ టాక్ ప్రకారం, పవన్ కళ్యాణ్ OG సినిమా షూటింగ్ ను జూన్ 2024 చివర్లో పునఃప్రారంభించనున్నట్లు తెలుస్తోంది. అయితే, ఈ విషయంపై అధికారికంగా ఎలాంటి ప్రకటన రాలేదు. డేట్స్ సెట్టయితే మాత్రం రెండు వారాల్లో పవన్ వర్క్ ఫినిష్ అవుతుంది. ఇక మిగతా మ్యాటర్ సుజిత్ మరో రెండు నెలల్లో ఫినిష్ చేయాలని అనుకుంటున్నాడు. పవన్ అయితే ముందే మాట అయితే ఇవ్వలేదు. రిజల్ట్ తరువాతే షూటింగ్ గురించి మాట్లాడతానని చెప్పాడు.
ఇక సినిమా రిలీజ్ లో కూడా మార్పు రాకూడదని పవన్ నిర్మాతకు ఒక భరోసా ఇచ్చినట్లు తెలుస్తోంది. OG సినిమా యంగ్ ఫిల్మ్ మేకర్ సుజీత్ దర్శకత్వంలో తెరకెక్కుతున్న మూడవ సినిమా. ఇందులో ప్రియాంక అరుళ్ మోహన్ హీరోయిన్ గా నటిస్తున్నారు. అలాగే, ఇమ్రాన్ హష్మీ, శ్రీయా రెడ్డి, ప్రకాష్ రాజ్, అర్జున్ దాస్ మరియు హరీష్ ఉతమన్ ముఖ్య పాత్రల్లో కనిపించనున్నారు.
DVV దానయ్య నిర్మాణంలో, థమన్ సంగీతం అందిస్తున్న OG సినిమా సెప్టెంబర్ 27, 2024 న విడుదల కానుంది. ఎన్నికల ప్రచారంలో నిమగ్నమైన పవన్ కళ్యాణ్ తన రాజకీయ బాధ్యతలు పూర్తిచేసిన తర్వాత, సినిమాపై దృష్టి సారించనున్నారు. ఒకవైపు ఎన్నికల వేడి మరోవైపు OG బజ్ అభిమానులను ఉత్సాహపరుస్తున్నాయి.
OG సినిమా ఒక భారీ అంచనాలున్న ప్రాజెక్టుగా ఉంది, పవన్ కళ్యాణ్ అభిమానులు ఈ సినిమాను ఎప్పుడెప్పుడు చూడాలా అని ఎదురుచూస్తున్నారు. ఎన్నికల ఫలితాలు వచ్చిన తర్వాత, పవన్ కళ్యాణ్ రాజకీయ భవిష్యత్తు ఏదైనా, OG సినిమా అప్డేట్స్ మరియు విడుదల రోజు అభిమానులకు మరో పెద్ద సంబరంగా నిలవనుంది. మరి ఆ సినిమా ఏ రేంజ్ లో క్లిక్ అవుతుందో చూడాలి.